大家仲記唔記得第一次同你嘅初戀相偶嘅一刻呢？我就好記得啦！當時係2000年代，文青啱啱考完試，我喺豐X電器遇上我人生嘅第一份愛。當時我哋只係對望咗一眼，就知道大家係命中注定嘅一對，於是我鼓起勇氣，求我呀媽買咗佢返屋企。我撫摸住佢又白又滑嘅身體，知道佢準備好之後，再慢慢咁將條電源線插入去－－係呀，電源線呀！哦，乜我冇話你知我講緊我人生第一部電腦咩？

我相信大部份Gents都係喺2000年代遇上「電腦」呢個大眾情人。佢陪我哋「曾渡過漫長的歲月」，捱過一個個寂寞夜晚；佢幫你溝過隔離班女神、又為你帶來川島和津實。你話如果真係要講同佢嘅回憶，真係講三日三夜都講唔完。日本Twitter近日就興起一個「#インターネット老人会(Internet老人會)」嘅活動，呼籲網友提出當年用電腦嘅回憶！如果你睇完都有同感，恭喜你！你正式進入「老CF」嘅階段啦！

螢幕保護程式：謎宮

螢幕保護程式：水管

相傳因為當年嘅「大牛龜(CRT)」螢幕因為技術所限，如果長時間地顯示一個靜止嘅影像，會導致螢幕內部嘅磷光薄膜變質，形成一個個殘影。為咗避免「長時間顯示同一影像」，Windows就加入螢幕保護程式，令電腦即使喺待機時的畫面都有變動。

而如果你當年有去過豐X睇電腦，就會記得佢哋只會使用三個螢幕保護程式：飛黎飛去嗰個氣泡、謎宮同水管。文青當年就花咗好多時間望住個謎宮睇下佢會唔會有出口。估唔到最後「迷失在.＊ 這場﹍×°愛情遊戲」

滑鼠入面粒波

中學上電腦堂時一定會拎出黎玩嘅嘢，直接導致個電腦房總有幾隻滑鼠因為冇咗個波波所以用唔到。就算粒波冇唔見，但因為太多人用又冇人清，久唔久就會Kick鬼住要拆出黎刮走啲塵。

3.5吋 Floppy Disk與磁碟機

雖然最普及嘅係3.5吋其實唔軟嘅「軟碟(Floppy Disk)」，但唔知點解文青好細過就見過5又1/4吋嘅版本。當年有位Uncle聲稱入面收埋咗隻Game，送咗畀我老豆，但之後我就冇再見過隻碟。直到某一個風和日麗嘅下午，我喺某個櫃底發現一整盒有標籤嘅3.5吋軟碟、打開之後發現原來係整理得井井有條嘅J圖，我就知道當年嗰隻，應該唔係Game咁簡單！

ICQ

噢，青春真可愛青春！有邊個未試過喺ICQ溝女？有邊個未試過鼓起勇氣問女神拎ICQ冧巴，放學即刻仆返屋企等人上線，仲留埋離線訊息等人覆？終於到夜晚9點鐘女神Online，佢「喔噢」你嗰剎那，係咪同當年《鐵達尼號》入面Jack喺船頭大叫「I am the King of the world~~」一樣咁興奮呢！

不過女神之所以係女神，就係因為佢唔係普通人會見到嘅。所以自此之後你就冇見過佢Online啦！因為佢Block咗你啦嘛傻仔！

56K撥號上網

咩都唔使講，淨係聽到呢下聲你都應該要記得當年要上網真係唔容易。首先你要說服呀媽比幾舊水一個月嘅上網月費，再拗贏你啲阿哥家姐唔好講電話(因為上咗網條電話線就用唔到)、唔好爭電腦，再撞中手神真係比你連到線(係可以連唔到)，你就可以用成大拿拿56Kbps嘅速度上ICQ比女神Block，然後斷線兼且成晚連唔返。

彈珠台

咁上唔到網可以做咩？可以玩遊戲！除咗萬年不衰嘅接龍、天才一定會玩嘅踩地雷同冇人明點玩嘅傷心小棧之外，識玩就一定係玩彈珠台。你睇佢畫面幾咁精美、啲音效幾咁震撼、個玩法有幾咁簡單同埋粒彈珠有幾咁好彈！想當年嘅新年，只要你一開屋企部電腦再開埋個彈珠台出黎，你就係小朋友之中嘅皇者，所有其他小朋友都要向你低頭：「青哥，畀次機會我彈下珠呀！一次咁多呀～」