100%天然兼全新又黎一個真人Barbie

文：MenClub 魏文青　　
POSTED ON 27 May 2015

之前同大家介紹過嗰啲所謂「真人Barbie」 (例如Valeria Lukyanova)通常一睇就知係120%純膠樣。唔好講話要除褲J佢，就連佢主動黎除你褲你可能都會調頭走。所以當呢個世界上又走一個「真人Barbie」出黎，仲聲稱自己冇整容、冇拍過拖、保證100%天然兼全新，文青嘅第一個反應係：「哦，下話？」

呢位來自俄羅斯首都莫斯科嘅26歲女仔Angelica Kenova，唔單止個樣似Barbie，連長大過程都係同一個Barbie公仔一樣。根據佢自己喺接受訪問時指，從小到大佢嘅父母都將佢當成一個公仔一樣看待。「他們把我當成是一個公主，從來不讓我外出、與男生約會、甚至做一個成人年該做的事。所以，我不適合正常生活－－我根本就是一個活人偶。」

「他們買最好的玩具給我，送我到最高貴的學校，而且確保一切麻煩遠離我。由我六歲開始，我媽媽就開始買Barbie公仔給我，而且非常熱衷於把我打扮成一個真人Barbie。我會在鏡子前面擺幾個小時Pose，再為父母的朋友表演。到我的青少年時期，父母就聘請了一個私人健身教練為我度身訂造一組訓練，所以我才可以有這個蹺臀和20吋小蠻腰。」冇錯，20吋小蠻腰，性感冇？如果再加32E上圍呢？

「我每個星期健身五日，每次兩至三小時。我的健身教練也為我訂製了一個秘密餐單。但我會建議人們多笑與愛自己，這是變得漂亮的天然方法。我也沒接受過任何整容手術！只有臉或者身體有嚴重缺陷的人才需要整容！」嗱，你呢句就得罪好多人啦……

儘管佢今年已經26歲、儘管佢喺世界各地有數以千計嘅Fans，但佢嘅父母依然嚴格監控佢嘅生活，唔單止唔畀佢搬出去住、買衫一定要有阿媽陪，連同男仔出街都要拖埋阿媽，所以到依家都冇男朋友喎。「我正在等待真命天子的出現。我不喜歡膠面男，我喜歡眼裏透出強悍與自信的粗獷男。我亦希望他不會是個胸無點墨的花瓶，而是個以事業為重的男人。」咁啱你就係棟高緊隻腳，左手拎支大啤、右手夾住舊火腩嘅真男人？係機會啦飛雲！仲唔嘭嘭聲飛去俄羅斯！