今時今日食嘢已經唔係單求味道出色咁簡單，外觀都非常重要，如果唔係一眾港女們又點能夠畀相機食先，打卡曬命呢？（利申︰Mean娜真係女仔）

近日Facebook同Instagram都頻頻見到一系列甚有特色嘅雪糕，又有棉花糖，又有小菊花，最得意係連啲雪糕筒都係有顏色！唔怪得咁多人影相大讚新奇有趣！

原來呢間雪糕店係位於尖沙咀嘅「放牛牛」，「放牛牛」於12月初開始試業，但已經成功吸引大家注意。「放牛牛」呢個名聽落以為真係食牛肉牛扒之類，但老闆話其實「放牛牛」係北海道一間牧場嘅名字。

「放牛牛」嘅老闆認為，北海道有好多好好味嘅雪縈非常值得推介，唔明香港賣嘅雪糕點解來來去去都係得嗰幾隻味，於是有心將北海道嘅雪糕文化引進香港，畀香港人試更多新口味雪糕。

「放牛牛」以日本五行元素為概念，研究咗富有日本意念嘅「地牛牛」、「水牛牛」、「火牛牛」、「風牛牛」四大雪糕，餘下嘅一個元素，老闆話係留返做秘密武器，不定時更換新雪糕，畀啲新鮮感大家。

先介紹海鹽味雪糕嘅「水牛牛」

「水牛牛」嘅材料包括自家製泡泡糖、藍莓、墨汁酥餅。話就話係海鹽味，但其實食落冇咸味，都係以牛奶味為主。

然後係薰衣草味雪糕「風牛牛」

「風牛牛」材料包括蜂蜜窩夫、菠蘿、威化雛菊。薰衣草味雪糕好香甜，喜歡花香味絕不能錯過。而最搶眼嘅威化雛菊其實係用威化皮去整，睇落好靚，不過其實食落係冇味道，只啱用來影相。

跟住係粟米雪糕味「地牛牛」

「地牛牛」材料包括燒日本甜薯、椰青、牛油酥餅。Mean娜最鍾意「地牛牛」，粟米雪糕味道濃郁之餘感覺仲好清新，燒日本甜薯同牛油酥餅等等配搭都好match，味道上係我心目中嘅number 1，不過如果只求影相，可能「地牛牛」冇其他幾款雪糕咁上鏡。

最後到朱古力雪糕味嘅「火牛牛」

「火牛牛」材料包括棉花糖、士多啤梨、朱古力酥餅。「火牛牛」都好夠朱古力味，而且影出嚟效果好好，可惜相比其他雪糕比較快溶，影得嚟都未必食得切。