早排發哥周潤發被問到，鍾意食燒鵝髀定燒鴨髀，發哥嘅答案係：「斬料！斬大嚿叉燒！」

雖然話叉燒又肥又甜，對所有keep緊fit，力圖擊退大肚腩嘅兄弟嚟講都係大敵，但當你遲遲未放lunch，又或者下午7點先食全日嘅第一餐，一碟香噴噴嘅叉燒飯再加罐冰凍嘅coke light/coke zero或者classic coke（如果有埋檸底就更好），豈止黯然銷魂，直頭係好味到攞命。

叉燒好味，一早得到老外認同，美國CNN曾經形容叉燒係「40款生命中不能缺少的香港食品」。

冇錯！「黯然銷魂飯」當然要有叉燒，既然咁多兄弟都鍾意食叉燒（唔計排球嗰啲），咁MenClub就搞個【好味燒味搜查系列】，刮吓邊度啲燒味係最掂，希望大家睇得過癮亦可以一齊input。

MenClub在開始呢個專題前，請教咗多位為食fit仔、fit佬同肚腩拍得住「滔滔」嘅食家，請教港島區邊間燒臘同燒味飯店最得手，好多人都讚灣仔再興，雖然網民對再興的評價好壞參半，但有爭議性先值得採訪嘛，咁Mean娜一於搵埋老總去試試，有領導埋單，伏咗都唔洗肉赤啦！

據講，再興早在清代已扎根灣仔，迄今逾百年歷史，聞說保留了不少二次大戰前香港的特有烹調方法，而掌管味道的揸fit人亦有超過40年經驗，因而令再興燒臘保留到古早味道。

講到咁巴閉，食過先實際！究竟真相係點？去片啦！

冇錯！就算閒日Lunch Time過後（採訪當日約下午2點45分），再興一樣塞滿客，望一望，清一色男子組，有chok樣型男、有西裝男，亦有類似送水泰神嘅物流大哥，難怪人哋話燒味飯係正宗嘅麻甩飯。

睇網上介紹，嚟再興，一定要食叉燒。作為鎮店之寶的叉燒每日賣近2,000條，總結各方來源消息，大部份人都話店主堅持多年無用味精、無鬆肉粉，叉燒大大件，調味時，店家仍習慣將一桶桶香料倒入汁料內，令叉燒更香更入味，加上表面甜甜的蜜糖，令再興入選《米芝蓮指南香港澳門2015》「米芝蓮車胎人美食推介」餐廳。

除了叉燒，再興的燒肉、燒鴨、燒雞口碑亦不俗。

燒肉都幾靚，如果唔係仲有採訪，一定切兩條骨番屋企同老媽子老豆開心share

老總叫咗叉燒燒肉飯，燒肉外皮香脆，但位置唔算靚，近腩尾位，好在都有咸香味，肉身亦都爽，證 明隻豬豬新鮮啦。不過，叉燒就普通咗啲啲。

雖然近腩尾位，但皮幾脆，肥瘦比例恰好

照咁睇，網民對再興評價如此極端都有其原因，去到有冇緣份遇見靚叉燒，都幾睇彩數。不過以米芝蓮級數而言，68蚊兩碟飯，抵丫。

地址︰灣仔軒尼詩道265-267號地下C座
電話︰2519 6639
營業時間︰星期一至六: 10:00-22:00 星期日及公眾假期休息 ；傳統中國節日如中秋、端午、冬至等: 10:00-18:00
價錢︰$50以下