{ SKIP }
文:MenClub Mean娜  圖:MenClub
POSTED ON 27 Mar 2015

各位Gentlemen,睇完華嫂冰室篇文覺得如何?有冇衝入去元朗試吓先?嗱,提醒你哋,排隊呢,就梗架嘞。真係唔耐煩,都仲有其他同區選擇嘅。

而家啲人成日話舊時點好點好,唉!陳舊咗,有幾多個可以復生?好似愈來愈多老牌茶餐廳摺埋,唏噓都無用,有心搵就一定有。去元朗,有特色嘅冰室或茶記當然唔止華嫂一間,仲有一間超過半世紀的(新)萬芳冰室,盡顯懷舊味道,點解話佢咁耐歷史都係新冰室?其實有段故嘅。


根據萬能的維基大神,大部分作茶餐廳運作的冰室,都係於1960年代至1970年代初開業。1959年開業的萬芳冰室,算得係香港冰室文化的先驅,留有傳統冰室風味,值得大家去懷緬舊屎,啊,唔係,係舊時。

藍綠色的萬芳冰室雖然主打懷舊(連個名嘅字向都由右向左),但畢竟是新餐廳,所以非常光鮮


始於1959年的(新)萬芳冰室,跨越半個世紀,認真耐歷史


好嘞!明明跨越半個世紀,點解萬芳仲係新冰室呢?話說1959年,店主的爸爸於屯門蔡意橋一帶,開了一間以嫲嫲為名的「萬芳士多」,專賣茶記食物,例如公仔麵、港式奶茶、多士、汽水。直至1964年,因政府收地而結業。結業後多年,萬芳士多的太子(即係萬芳冰室老闆),決定捲士重來,於元朗開設冰室,主打懷舊,重拾當年回憶。除了食物充滿古祖風味,連裝修都依照70年代冰室作藍圖,例如70年代唱片、畫報、照片、鐵閘等等,都非常復古,比起同類冰室格外吸引。


冰室內貼滿不少6、70年代,香港的舊照片


刻有萬芳冰室的摺閘,好六、七十年代feel


天花吊著小飛俠阿童木模型,增添了一點復古的童趣


柯德莉夏萍都嚟歎凍飲?


呢張亂世佳人手繪壁畫,的確由邵氏年代,專畫電影海報的老師傅畫,仲足足畫成2日


另外冰室更特設兩個圓弧形的包房,等你可以同朋友坐埋一邊傾計,成間冰室即刻高級咗。


包廂房十足酒樓裡的VIP房,享有私人空間,唔怕畀打擾


食物方面,萬芳冰室專攻老一代茶記食品,例如洋葱雞絲餐包、蝦多士、炸髀薯條、雜果啫喱、薑檸樂等等。


「重拾舊日的真、情、味」,明Sell老味道

薑檸樂用樽裝可樂,係唔係好飲啲?都係


炸雞脾沙律


炸脾非常大隻,外皮熱辣辣而且非常香脆,切開白滑的雞肉,有肉汁喎。灑少少鹽,好香口惹味。沙律就普普通通啦。


紅豆冰、雜果冰


冰山紅豆冰及冰山雜果冰都氣勢爆燈,味道不算突出,但一邊挫冰一邊食紅豆,的確夠凍夠爽皮。


山長水遠同朋友入元朗,食茶餐唔夠喉?萬芳冰室都有粉、麵、飯提供。一班兄弟長途跋涉入到嚟,叫幾個飯Share食,飽肚又滿足。


夠鑊氣的星州炒米,啱唔啱心水?

後記︰

想嚟萬芳冰室的Gentlemen毋須擔心地方偏遠,因為冰室對開已經有地方泊車,揸車嚟方便快捷,仲唔駛特登搵位停車,一泊埋去,幾步路已經到達萬芳冰室。



萬芳冰室

地址︰元朗建德街45號時景花園地下
電話︰2870 2777
營業時間︰星期一至日︰7:15 - 21:30
價錢︰$50以下
網址︰https://www.facebook.com/manfongcafe


對於香港人黎講,打邊爐素來都係不分季節嘅美食,即便係過去疫情期間大家出唔到街,但都可能會買急凍料返屋企食餐好嘅。好似本地網店ChumPlus就曾經於疫情推出急凍牛雜鍋,更大賣超過十萬份。近日佢哋更進駐觀塘巧得 ...
gourmet
【火鍋】疫情期間賣出十萬份 觀塘青藤椒牛雜鍋
21 Jun 2023
近日外國傳媒爆出,以「Salt Bae」之名走紅嘅土耳其籍廚師Nusret Gke,近年身陷多宗與前員工之間嘅官司,當中嘅罪名包括佢「剋扣貼士」、性別歧視、於餐廳內不公對待員工等。令佢原本就唔太好嘅名聲進一步受挫。 ...
gourmet
【美食】剋貼士、性別歧視「Salt Bae」被前員工連環控告
27 Apr 2023