- SITE MAP
- |
- CONTACT US
- |
- ADVERTISING
- |
- PRIVACY
- |
- MOBILE
- |
- RSS
| |
如果要數阿根廷傳奇級球員，除左兩代球王馬勒當拿及美斯之後，相信就係人稱「戰神」嘅巴迪斯圖達。巴迪斯圖達又有人叫佢做巴迪高，點解？聽聞係因為佢實在入太多波，所以都費時叫佢全名，真接就叫佢巴迪Goal~~~~所以就變左巴迪高啦。對於一班較年輕嘅球迷可能真係對呢位射手無咩認識，不過對於一班有番咁上下資歷嘅球迷，就知道巴迪高有幾咁令人回味架啦。 | |
| 相信唔少人都知道，宜家阿根廷國家隊入球最多嘅球員就係美斯，佢目前已經為球隊攻入左58個入球，平均每仗攻入0.49球。咁係呢位現代球王出現之前，阿根廷入球最多嘅球員又係邊個呢？無錯，就係巴迪高啦，佢喺阿根廷一共入左54球，雖然總入球數比美斯過左，但係佢平均每場可以攻入0.718球，呢個數字係阿根廷國家隊入面最高架。 | |
| 就咁睇一睇巴迪高喺國家隊嘅入球率係咪已經好驚人呢？無錯，佢就係足球史上一位偉大嘅射手之一，而佢亦到成功入選當年FIFA100嘅其中一位阿根廷球員，所以佢嘅歷史地位真係一啲都唔可以睇少。 | |
| 現年48歲嘅巴迪高，已經退役離開足球壇，並移民至澳洲享受悠然自得嘅生活，而佢嘅足球生涯就由佢9歲加入阿根廷本土球隊Platense開始。加入Platense後，巴迪高一直喺個度接受青訓，並有一次有機會代表球隊青年軍上陣面對紐維爾舊生，最後巴迪高個人梅開二度，成功擊敗對手，從而引來唔少球探關注，最終佢喺1987年被自己擊敗嘅紐維爾舊生相中，簽下人生第一份職業球員合同。 | |
| |
| 雖然成功加入一支當地著名嘅球隊，但係巴迪高卻未能立刻喺球隊站穩陣腳，首季上陣21場攻入7球。數據看似中規中矩，但係後來巴迪高卻出現體重下跌問題，最終喺賽季尾段被球隊外借至阿根廷本土嘅一支小球會Deportivo Italiano。 | |
| |
| 1989年，巴迪高轉投阿根廷傳統班霸河床，加盟首季呢位年輕射手已經為球隊帶黎17個入球。正常唔少人都認為河床搵到佢地想要嘅射手，巴迪高呢個時候卻傳黎同教練不和嘅消息，最終短短效力河床一年便被送走，而佢嘅下一站就係阿根廷另一支班霸小保加。 | |
| |
| 加入小保加後，巴迪高曾短暫迷失，因為佢喺呢支球隊搵唔到最適合自己嘅位置。不過後來小保加更換左教練，佢將巴迪高放喺正中鋒位置，並且為佢增加支援，最終巴迪高成為聯賽神射手，而小保加亦成功奪得聯賽冠軍。 | |
| 1991年，22歲嘅巴迪高首次入選阿根廷國家隊，並隨隊參加美洲國家盃，而最終佢以6個入球成為賽事神射手，兼且助阿根廷奪得了賽事冠軍。就係因為呢次美洲國家盃出色嘅表現，巴迪高成功吸引意大利球隊費倫天拿副主席留意，並隨即將佢簽下。 | |
| |
| 登陸意甲第一季，巴迪高已經有唔錯嘅發揮，佢喺上陣30場比賽入面攻入左14球。不過喺費倫嘅第二季，雖然巴迪高個人攻入左16個聯賽入球，但係球隊戰績惡劣不幸降班。對於球隊降班，巴迪高並無因此就離隊他投，他跟隨球隊一同跌入意乙聯賽，並喺26場比賽入面攻入16球，最終助球隊拎到意乙聯賽冠軍，第二季立刻重返意甲。由於巴迪高對球隊不離不棄，所以倫費天拿嘅球迷都非常喜愛佢，好快佢就成為左球隊嘅寵兒。 | |
| 協助球隊重返意甲後，巴迪高即刻喺意甲展示自己超強嘅入球能力，喺1994-95球季佢就以26個聯賽入球成為神射手。1995-96球季，喺巴迪高嘅帶領下球隊成功奪得意大利盃冠軍，後來球隊又成功奪得意大利超赧盃，一口氣連得兩個獎盃，成就了費倫天拿隊史最佳戰績。因此，費倫嘅球迷為左歌頌呢位球隊傳奇，故要求球隊為佢建造一個銅像。 | |
|
| 雖然巴迪高一直都表明心跡希望長留費倫天拿，但喺黎到1999-2000球季嘅時候巴迪高希望可以效力一支更大嘅球會，以尋求冠軍及參加歐聯賽事，最終佢喺2000年夏天以700億里拉(3615萬歐元)轉會加盟羅馬。 | |
| 加盟羅馬首季，巴迪高立刻交出令人滿意嘅表現，個人喺聯賽轟入20球，成功為羅馬帶黎自1983年後首個意甲聯賽冠軍，而呢次亦都係巴迪高生涯唯一一個聯賽冠軍，都叫完左佢作為球員嘅一個夢想。而巴迪高喺面對倒戈費倫天拿嘅比賽入面成功取得入球，但係佢就完全無慶祝嘅舉動，甚至有點想哭咁，可見佢係有幾愛呢支舊會。 而可惜嘅係，奪得意甲冠軍後巴迪高嘅表現大幅下滑，由上一季聯賽攻入20球，相隔一季就只喺聯賽攻入6球，最終羅馬亦未能衛冕，以1分之差被祖雲達斯搶下聯賽冠軍。 | |
| 喺羅馬效力第三季，巴迪高表現依然無咩大起息，並且更同隊友們鬧不和，所以喺賽季中被球隊外借至國際米蘭半季，之後就離開意甲聯賽轉戰卡塔爾聯賽，加盟艾阿拉比球隊。黎到較為低級嘅聯賽，巴迪高亦重捨射門鞋，單季攻入25球成功打破卡塔爾聯賽嘅入球紀錄，可惜之後佢由於身體受傷患困擾，所以被迫喺2005年3月15日正式宣佈退役，當時嘅佢只有36歲。 | |
| 國家隊方面，巴迪高一共為阿根廷帶黎2次美洲國家盃冠軍(1991及1993年)及1次洲際盃冠軍(1992年)。另外，巴迪高個人則曾經奪得過阿根廷足球先生(1998年)、意甲最佳外援球員(1999年)、世界足球先生第三名(1999年)、意大利聯賽名人堂、羅馬名人堂及費倫天拿名人堂成員。 | |
| 雖然巴迪高球員生涯無達到球王級水平，但係佢嘅入球能力都真係舉世無雙，每次睇佢嘅勁射都真係睇到人熱血沸騰，因為真係球球都差唔多係金球，仲有佢嘅「獅子搖頭」亦都係非常之咁出名，真係好令人懷念。對於呢位一代前鋒，你又係唔係佢嘅球迷呢？ | |