【10場8球】曼城高效「耶穌」 - 捷西斯

文：MenClub 波特先生　　圖：互聯網
POSTED ON 18 Oct 2017

岩岩最新一週嘅英超，曼城以7：2大勝史篤城，加上曼聯同利物浦踢成0：0，令曼城成功拋離曼聯獨佔聯賽榜榜首嘅位置。而曼城能夠壓倒一眾豪強，靠嘅就係強大嘅攻力，佢地嘅攻擊線極奇豪華，除左阿古路之外，仲有辛尼、史達寧及捷西斯，而今日要講嘅就係只有20歲嘅巴西射手捷西斯。

今年1月，曼城從巴甲球隊彭美拉斯成功簽入捷西斯，由於新加盟關係，捷西斯並無即時成為球隊嘅主力，半季落黎佢只係上陣左10場，其中2場係後備，但只係10場比賽，佢就已經為球隊攻入7球，並交出4次助攻，可見佢嘅效率相當地高。

而黎到今季，捷西斯已經成為球隊嘅正選，哥迪奧拿對佢相當信任，而佢亦用出色嘅表現黎報答教練，今季7場英超賽事，捷西斯已經攻入6球，同兩位隊友阿古路及史達寧一樣排名英超射手榜第二位，僅落後攻入7球嘅曼聯前鋒盧卡古。

除左喺英超，捷西斯喺歐聯亦有進帳，3場比賽落黎佢亦有2個入球，而出色嘅表現令哥帥願意比更多機會佢，基本上呢位巴西小將已經成為球隊嘅絕對正選。

捷西斯係一名技術全名嘅前鋒，佢擁有出色嘅速度、技巧、盤扭技術、終結球能力，工作態度亦非常專業。對於呢位後輩，巴西傳奇朗拿度亦報以信心一票，佢曾經表示捷西斯將會喺國家隊取得成功。而果然，2016年進入巴西國家隊嘅捷西斯，至今已經上陣11場，並交出7個入球，助球隊成功喺世界盃南美洲區外圍賽以第一名嘅姿態殺入決賽週。接下來，捷西斯將需要繼續喺曼城取得更多入球及成功，並將出色嘅表現帶到巴西隊，然後喺明年挑戰世界盃冠軍寶座。

如果要比較年輕一輩嘅射手，相信能夠同捷西斯相提並論嘅球員就只有巴黎聖日耳門嘅射手麥巴比，呢位只有18歲嘅球員上季效力摩納哥整季攻入26球，並助球隊殺入歐聯四強，而今季亦上陣6場下攻入3球，表現並不比捷西斯差。因此，相信未來世界最佳射手嘅皇座好大機會由呢兩位球員競爭。