曾幾何時，虛擬歌手 / 虛擬樂團 (Virtual Band) 呢個話題引起過各地樂迷嘅熱烈討論。到底「虛擬」出嚟嘅歌手，樂團，同埋佢哋製作出嚟嘅音樂作品，是否「真正」嘅音樂呢？位於亞洲嘅香港，相信對「虛擬歌手」的認知可能係嚟自日本「VOCALOID」家族，即係以初音未来為首，基於「VOCALOID」軟件嘅一眾虛擬歌手。

咁喺西方社會嘅音樂世界呢又有無「虛擬歌手」呢個概念呢？當然有啦，而且仲玩到上哂大場面。其中，Gorillaz 呢一隊虛擬樂團可以話係當中嘅表表者。

Gorillaz 現時係由 2D，Ace，Muredoc Niccals，Noodle 同 Russel Hobbs 五位虛擬角色組成（無錯，Virtual Band 都會有隊員更替呢吓絕），而且呢隊虛擬樂團嘅背後，係由英國樂團 Blur 嘅 Vocal — Damon Albarn 同埋 英國 Artist — Jamie Hewlett 創造出嚟，當中更係由 Damon 一手包辦哂樂團入面嘅所有 Role。Gorillaz早於 2000 年嘅時候已經發行首支EP，並喺 2001 年發行樂隊同名 Album。

發展至今，Gorillaz除咗拎過唔少英國本土音樂獎項外（例如MTV Video Music Awards 同NME Award），喺美國嘅口碑亦唔錯，專輯銷量更多次比英國本土為多，更曾經喺 2006年憑住 "Dirty Harry" 奪得 Grammy Awards。我個人認為，多年嚟人氣不跌反升，依舊備受注視嘅原因係：樂團作風明確，就係夠喪夠癡線。無論係樂團成員嘅背景，故事，又或是作畫風格同埋音樂風格，都係好Crazy！

Gorillaz - Dirty Harry (Official Video)

Gorillaz 嘅出品唔算出得密，亦都唔算出得多，更加曾經喺 2010 至 2017 年呢 7 年間完全無新 Albums 面世，所以一片沉寂之後，引來嘅回響就更加大，而最新專輯 《The Now Now》亦喺三個月前面世。唔知係咪因為上年嘅 Comeback 專輯造勢太強，而擔心今年新專輯嘅銷情呢？Gorillaz 喺琴日將最新專輯中嘅歌——《Tranz》嘅Music Video 釋出，仿佛係叫緊樂迷們唔好唔記得我哋咁；而 MV 嘅風格都係一貫嘅 Style，無論係背景配色，又或是虛擬角色們嘅動作，都係誇張得嚟吸引眼球。