FIFA19嘅試玩版較早前已經推出，相信各位玩家已經急不及待試緊同上一集嘅控制有咩分別，當然仲有試下擁有C朗拿度嘅祖雲達斯等等啦。而最新呢集FIFA有傳將會加入田徑傳奇跑手「閃電」保特加入，大家又覺得佢嘅數值應該會幾多？

作為奧運短跑8金得主，保特係田徑史上嘅傳奇及王者，而佢喺去年決定退役，離開田徑賽。不過，保特並未有消失於人們嘅眼前，因為佢決定轉戰佢鍾情嘅足球，並喺今年正選同澳洲球隊中岸水手選約，成為一同職業足球員。

既然成為一名已經註冊嘅正選足球員，咁即係話FIFA呢隻Game都有機會收錄左保特，咁究竟會唔會真係有佢呢？而佢嘅數值又會係幾多呢？

近日網上就有傳保特喺FIFA19嘅資料卡，可以睇到佢嘅速度達到遊戲入面最高嘅99，呢個數值絕對合情合理，要知道保特係貴為曾經「地球上最快嘅人」。不過，再睇保特整體嘅數據就只有49，其中盤扭57、射門40、防守18、傳球35、體能76，作為一名翼鋒憑住佢嘅速度佢可以專責爆底，但係傳球咁差就真係好難交到啲咩靚波比隊友入球啦。

而睇番上一集FIFA，速度最快嘅球員為如今效力阿仙奴嘅奧巴美揚，當時佢嘅速度值為96，所以保特嘅99速度絕對係FIFA歷史之最。當然，FIFA19有無保特同佢嘅數據真偽仲有待驗證，但係相信如果真係有佢嘅話，到時絕對會有唔少人一用呢位「地球上最快嘅人」！