距離 Clockflap 2018 舉辦嘅日子又近咗一個月啦（留意返係十一月）而首發 Line Up 後嘅一個月，再睇返最新嘅陣容，繼續有更新，亦繼續有驚喜，以下係更新後嘅 Line Up。

(呢度係我上次嘅首發介紹)

（次序為依照 Clockenflap Official Website 所顯示的次序；另外粗體為首發 Line Up 後新加入單位。）

照舊啦，以下係我自己私心嘅音樂單位介紹，今次更新嘅音樂單位更加有兩個係嚟自香港，當中當然要私心介紹。

D.A.N.

呢隊以製作無論咩時代都十分岩聽嘅音樂嘅日本樂隊，由櫻木大悟，川上輝同市川仁也三名成員喺2014年組成，而且最勁嘅係喺組團翌年就登上 Fuji Rock Festival 嘅 Rookie A GO GO 新人舞台；同年更發行首張EP (真係就咁叫EP)，唔知係因為 Fuji Rock 嘅後勁，定係個EP個名改得好，呢隻EP喺日本可以話好大嘅回響，2016 年亦再次登上 Fuji Rock Festival 。而佢咃更藉住岩岩推出嘅新碟，舉辦專輯同名 Tour，除咗日本本土，更走向中國大陸，台灣同泰國，風頭一時無兩。

EP 嘅 Ghana 一曲，值得留意嘅係 MV 搵咗 Ryu Okubo 做導演，用上Rotoscope手法將樂團成員融入動畫當中；再加上 Ryu Okubo 自身風格嘅插畫，完全嘅視聽享受。

因為其偏道而行嘅電子音樂；加上其獨特音風，初出道時已經被日本樂迷戲稱為「和製 The xx」，喺對現今轟炸式嘅EDM音樂感到疲勞之際，聽返 D.A.N. 呢啲「夠用就得」嘅電子音樂抖吓，都係一個Good Choice。

雞蛋蒸肉餅 GDJYB

大家可能對呢一隊由四位女子組成嘅香港獨立樂隊並不陌生。其出眾嘅隊名，其作品為香港少有的Math Folk 風格，再加上其歌曲夠貼地，大多內容都圍繞生活而且敢作敢言，就成為咗本地近年最出眾嘅獨立樂隊之一。

至今出道六年，得到嘅除咗係 Fans 群，仲有更多嘅演出機會。雞餅曾先後參與新加坡、三藩市、東京、台灣、冰島等各地嘅音樂節演出，更加曾經以《23:59 Before Tomorrow》專輯獲提名第 28 屆台灣金曲獎嘅「最佳樂團」，成為首隊入圍該獎項的香港樂隊。當然啦，時光嘅流逝同多次嘅演出換嚟嘅除咗係名聲，仲有最重要嘅經驗，不論係現場演出定係作品製作，昔日嘅少女如今更顯功架。

今年嘅新歌 ，除咗因為獲得 Eason 陳奕迅喺電台點名讚賞之外；其歌詞帶出嘅信息亦係要留意之處，值得聽聽。

同樣啦，唔好驚唔識，去獨立音樂節同你識女仔一樣，唔踏出第一步永遠唔知係好定唔好，岩你定唔岩你。順帶一提，而家用 PayMe 買 Clockenflap 門票有Discount，唔知幾時完，要買趁早！