{ SKIP }
文:MenClub 魏文青  圖:互聯網
POSTED ON 05 Mar 2015

大家仲記唔記得上年11月,我哋都睇過一個「最強《Jump》漫畫TOP 20選舉」呢?當時個結果雖然滿足唔到所有Fans,但都總算合情合理。事隔幾個月,日本網民又黎多次《Jump》最強漫畫選舉,但今次個排名就好令人費解,甚至有一套無論如何都應該係前列排名嘅作品,連榜都上唔到……

利申先,個票選係日本網民在2ch揭示版選出黎,係完全唔關本文青事。所以你有咩不滿就麻煩自己去2ch 拆掂佢,唔好搞我,更加唔好Hi我Auntie!清楚啦嗎?明白啦嘛?去榜架啦喎?


第10位:《龍珠》鳥山明

首先讓我冷靜地提醒你,呢個榜係由尾數返上去,所以你依家睇緊呢個位,係第10位!再提提你,《龍珠》喺上次個排行榜係排第一嘅。好啦,你依家可以開始鬧人啦!

OKOK,龍珠個故事係咩我諗唔使我再介紹;而從人氣黎講,一套完咗成廿年,但到依家都仲係人氣高企嘅經典作品,竟然會被選為第10位,都真係令人跌哂眼鏡!不過未算架,你睇埋有啲咩排喺佢上面,你可能會更加嬲!


第9位:《棋魂》原作:橫手美智子 作畫:小畑健

被本文青認為係「明明睇唔明但係又覺得好好睇嘅漫畫」。以一個非常獨特嘅題材畫一個非常有趣嘅故事,加上小畑老師嘅畫功,上榜係好合理嘅事!上次排名係十四,今次排喺《龍珠》前面就…嗯……Well……


第8位:《死亡筆記》原作:大場鶇 作畫:小畑健

掀起一股「用腦睇漫畫」嘅旋風、明明係漫畫但超級多字、出色嚴謹又解得通嘅設定,《死亡筆記》都算係前無古人後無來者嘅作品。同樣地,上次作為第十五位,今次上榜係合理嘅,但同樣地,排係《龍珠》前面就…


第7位:《行運超人》蒲生洋

如果要你數喺Jump連載過嘅漫畫,你可能數一世都未必數得出《行運超人》,但一講「Lucky!Cookie!滅火池池池!」嘅行運超人、用豆腐打造出超重鐵屐嘅努力超人、為求勝利不擇手段嘅勝利超人,你又不費吹灰之力就可以回想起佢哋個造型。呢套由蒲生洋畫嘅搞笑漫畫近年多次被人譽為隱世神作,娛樂性係毋容置疑!但換個角度諗,要人提先諗返起嘅漫畫,又算唔算係「最強」呢?


第6位:《封神演義》藤崎龍

以傳統中國神話為主題,配以各種疑似高科技造型,構造出九十年代中後期最受歡迎嘅《Jump》連載。雖然喺香港嘅人氣就冇咁高,但仍然有唔少Fans!


第5位:《家庭教師HITMAN REBORN! 》天野明


和目前連載的《暗殺教室》有異曲同弓之妙,都係講述殺人能力超高的殺手成為老師嘅故事。初初係搞小品為主,但中後期就轉為頻繁戰鬥。喺上年11月嘅排行榜中排十七!


第4位:《JoJo的奇妙冒險》荒木飛呂彥

天馬行空嘅戰鬥能力、荒木老師的獨特畫風,《JoJo》都可以算係目前《Jump》旗下連載中最具特色嘅一部。


第3位:《電影少女》桂正和

講述由電影中走出來的女生幫助男主角的愛情煩惱,乃是桂正和老師嘅第一部戀愛漫畫,比97年的《I"s》早咗8年!但好老實講,本文青唔好話睇,真係連聽都未聽過呢套作品…我知我係孤陋寡聞--但我深信唔會淨係得我囉!排第3喎?


第2位:《暗殺教室》松井優征

講述黃色章魚狀超生物「殺老師」在炸咗70%月球,並威脅明年要炸掉地球之後,卻不明地成為椚丘中學三年級E班的班主任。而E班的同學要一邊學習,一邊計劃暗殺「殺老師」,獲得高額報酬;但同時在「殺老師」嘅教導下,同學們亦獲到很多不同的東西。

目前正在連載當中的人氣作,動畫版啱啱開播,真人電影版又黎緊。被視為《火影》完結、《死神》白紙化之後,與《One Piece》、《美食獵人》撐起《Jump》門面的作品。


第1位:《火影忍者》岸本齊史

唔需要多講啦!雖然又稱「火滾撚者」,後期忍界大戰又變成地圖互轟嘅「超級系」戰爭。但一黎人氣的確高企,二黎係唯一「冇拖戲」嘅前「御三家」作品。上榜、甚至排榜首都係合理嘅!


係咁多啦,十位數哂啦!咁《男兒當入樽》、《幽遊白書》、《Hunter X Hunter》、《北斗之拳》、《足球小將》同《聖斗士星矢》呢?甚至《To Love》、《黑子的籃球》、《光速蒙面俠21》、《排球》之類,難道會比《行運超人》同《電影少女》差?OKOK,呢啲我都算啦,《One Piece》連十大都冇喎?《One Piece》喎!你呢個榜仲有咩公信力呀?

所以話呢個榜其實唔係話你知邊部《Jump》漫畫最受歡迎,而係話你知「民主」嘅重要性--就算你冇去投,你都可以提出疑問,反對選舉結果!比著喺某啲大國,可能冇人會選擇解決問題,而係諗住解決提出問題嘅你架!



由Denis Villeneuve執導嘅史詩科幻大片《Dune: Part Two(沙丘瀚戰:第二章)》叫好又叫座,截止目前全球累計票房高達5.79億美元,於各大影評網站獲得高度好評,就連名導史提芬史匹堡亦給予高度肯定,大讚《Dune 2》 ...
hobby
【影視】史提芬史匹堡大讚《沙丘瀚戰2》:我看過最精彩的科幻電影之一
28 Mar 2024
因為「掌摑事件」而沉寂咗一排嘅Will Smith,今年夏天將聯同老拍檔Martin Lawrence再次回歸大銀幕,繼續搞笑互相鬥嘴。 經典動作喜劇《Bad Boys(重案夢幻組)》最新續集《Bad Boys: Ride or Die(重案 ...
hobby
【影視】Will Smith沉寂兩年回歸!《Bad Boys 4 重案夢幻重組再重組》公開首部預告
28 Mar 2024