所謂最鋒利嘅刀都有生鏽嘅一日，更何況係人呢？年紀大咗，係時候計劃人生最後一件事，無謂成為仔女嘅負擔……唔係唔係！我唔係叫你哋買姜大衛保險，係叫你諗定究竟叫個仔燒邊本漫畫結局比你呀！你知啦，《One Piece》、《Hunter》、《火鳳》、《足球小將》乜乜乜乜本本都要燒，先唔好理對地球環境有咩影響，淨係諗下對你仔女嘅荷包有咩影響都夠得人驚啦，更何況依家個個都上網睇，你仔女要燒隊漢化組先得掂喎！

其實解決方法好簡單，你夠長命咪得囉！日本網站R25近日就公佈咗一個調查，訪問200名20-40歲男士喺死前最希望睇到結局嘅漫畫！

第10位：足球小將

正如我之前講過，足球小將係一套顛覆人體比例而及時間觀念嘅漫畫作品，唔好話細個睇卡通傳一腳波搞幾集，淨係睇佢由《Road to 2002》搞到《海外激鬥篇EN LA LIGA》足足十年，志偉先拎到第一個西甲冠軍，你就知時間呢家嘢真係相對嘅。新連載《Rising Sun》講世界杯喎，唔知又要搞幾耐啦！

第9位：烙印戰士

由三浦建太郎所畫嘅「劍與魔法」漫畫，憑著出色嘅人格設定與感情描寫成為粉絲心中嘅至愛。但近年就因為作者健康問題而不定期連載，單行本由每年兩本變成每兩年一本，甚至連三浦老師本人都話唔知死之前能否完成結局……講開第38期究竟有冇出過？

第8位：美味大挑戰

超長篇烹飪漫畫，由雁屋哲和花咲昭於1983年開始連載至今。值得慶賀嘅係連載相對穩定，加上上年曾經描寫日本大地震後的福島，並寫到「福島已不適合居住」，證明兩位老師仲有緊貼時事。完唔完到睇黎只係「想唔想」嘅問題。

第7位：第一神拳

由森川讓次老師所畫，《週刊少年Magazine》史上最長篇動畫，至今已經連載26年，出版超過104本單行本！

第6位：浪客行

相比起榜上其他作品，由1998年開始連載的《浪客行》算係相當「新」嘅作品。由《男兒當入樽》作者井上雄彥所畫，畫功靚係唔使講，再加上「宮本武藏對佐佐木小次郎」呢個不死題材，人氣亦都非常高。順帶一提，井上老師手上面仲有套講輪椅籃球嘅《REAL》喺《Jump》連載緊，所以比起某啲作者(例如下面嗰個)，算係好多產架啦(雖然兩套都不定期連載緊)。

第5位：Hunter X Hunter

即係咁，假如你諗起《Hunter》，但又冇同時諗起「富奸」同「休刊」，我夠膽講你冇資格話自己睇過呢套作品。由草稿事件到休刊N年再到近期嘅長期腰痛，已經將Fans們對作品嘅愛化成對作者嘅恨！不過講就咁講，佢復刊我都係會追嘅。

第4位：骷髏13

由1968年起連載嘅犯罪漫畫，講述超一流狙擊手「Golgo 13」的犯罪故事，目前出版168本！

第3位：名偵探柯南

日本漫畫界兩大死神之一。比起另一位「死神」金田一先生，柯南就勤力得多，直到3月為止都仲係個個禮拜出動害死人，直到青山剛昌老師因為手術入院先改為不定期連載。同時亦可能係整個榜上面最快完嘅作品。因為青山老師講過，希望在1000話之內完結故事，而目前已經去到920話。

第2位：烏龍派出所

至今連載超過1800話，乃係健士氏世界紀錄大全中「連載回數最多的少年漫畫」。基本上無主線劇情嘅設定亦令到秋本治老師想畫咩就畫咩、畫幾耐就畫幾耐。

第1位：One Piece

史上最暢銷漫畫，到第72卷為止，日本本土累計發行3億本！由於主角一行人人數越黎越多，近年在故事處理上經常受到粉絲批評(但文青認為睇單行本係唔覺有太大問題)，亦有擔心尾田老師會應付唔黎。觀乎近月尾田老師多次休刊，擔心似乎都有道理。