全球最大初號機7月登陸箱根

文：MenClub 魏文青　　
POSTED ON 29 Jun 2015

唔使望啦，使徒唔會打到黎架啦！就算打，人家都係打第三新東京市，香港冇呢個福份，所以樓價係唔會跌架啦！反過黎講，樓價唔跌即係我去少啲旅行都買唔到樓，咁就不如去旅行算啦！咁去邊？不如就去返第三新東京市！因為黎緊七月佢就會有部「全球最大」嘅初號機棟喺到啦！

咪先，個頭唔使顎到咁高嘅，因為「全球最大」其實即係大約6米高，而唔係40米嘅1:1版本。喺黎緊7月17日開始到12月23日，位於箱根附近嘅東名高速休息站「EXPASA足柄」就會改裝成「NERV本部」嘅模樣。到時除咗大型初號機，仲有2011年「TOYOTA電力補完計劃」下嘅EVA塗裝PRIUS，同2012年喺東京SKYTREE展出過嘅「朗基努斯之槍」。

唔少得嘅當然有各種限定商品、主題食物等等等等。而且因為「EVAGALION RACING」會參加7月23-26於日本鈴鹿賽車場舉行「8時間Road Race」，所以都會襯呢個機會派出幾位賽車女郎去「EXPASA足柄」宣傳。即係有機睇、有嘢食、有女玩(?)，仲唔係週末好去處！