今年唔玩VR真係冇偈傾，所Sony趁住熱潮，會喺今年動漫節擺定17部PS VR等大家試玩，而且仲可以玩到10款啱啱喺E3展出過嘅遊戲，好似《GT Sport》、《FF XV》同《Horizon Zero Dawn》等，唔知有冇機會玩埋VR《Biohazrd 7》呢？

今年PS E3公布咗唔少大作，而VR遊戲更加係焦點所在。為咗等香港玩家可以盡快試到PS VR遊戲，今次就整咗大型PS VR試玩區，足足有17部PS VR畀大家玩，可以試到《Farpoint》、《Until Dawn: Rush of Blood》、《THE PLAYROOM VR》同《VR World》等最新PS VR遊戲，由特擊、恐怖到合家歡都有。咁有冇大家期待嘅《Biohazrd 7》呀？問過佢哋就話「入場咪知囉！」，聽落似係有驚喜喎。

除咗遊戲試玩之外，7月28日喺場內仲會有一個「PlayStation VR 亞洲區發佈會」，將會正式宣佈PS VR香港同亞洲地區嘅售價同發售日期，仲會進行網上直播，場內場外都可以直擊到呢個重要時刻。至於PS年年動漫節都會嘅福袋同優惠，就會去到7月12再公布。有機打，有優惠仲未夠。我問過Sony代表，知道佢哋仲會空運大班索台妹過嚟撐場，真係齋去PS個攤位都有排玩。