李羅渣 - 轉會窗最後一日幾個懸念

文：李羅渣　　
POSTED ON 27 Aug 2016

圖片：Skysports
我好鍾意睇每季夏天轉會窗嘅最後一日，因為呢日係特別多嘢發生，淨係英超，都有唔少等待解決嘅轉會傳聞或者球會轉會策略嘅問題等緊結局，不如抽幾單英超轉會傳聞俾大家睇睇啦。
圖片：Skysports
小豬的下一站因為傷患問題加上唔適合摩連奴戰術而被下放預備組嘅舒韋恩史迪加，幾乎可以肯定唔會再為曼聯上陣，連打預備組都非常忟水。但小豬早幾日仍然向曼聯表忠，話只要球隊需要佢就隨時可以上陣，亦唔會打其他歐洲球會，曼聯用賤家200萬鎊掛牌都無人認頭，唔通小豬今季要喺預備組過？
圖片：Telegraph
祖赫特轉戰西甲？哥迪奧拿入主曼城崇尚控球打法，甚至門將都需要有一定技術同傳送準繩度，祖赫特被打入冷宮正正因為傳球成功率偏低所致，加埋曼城正式簽入巴禾，祖赫特離隊只係時間問題。本來愛華頓都想借佢一季，點知借用費都成700萬鎊，加上積斯基拿倫開季表現不俗，所以就擱置左引入計劃。而家就只係睇西維爾係咪會正式買斷祖赫特。
圖片：goal
阿仙奴仲買唔買中堅？雲爺爺話咗會俾錢大手買人，但奇怪嘅係中堅傷兵滿營下點解仲容許張伯斯可以外借離隊？真係得雲加先知，但係阿迷又唔使咁擔心，奧斯爾當年都係last day簽返嚟，可能31號雲加真係買到有質素嘅中堅呢？
李羅渣 (facebook page: https://www.facebook.com/leerogerfcpage/) 八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員由懶到出汁變成泰拳愛好者除咗足球最鍾意就係睇戲、睇書、飲兩杯唔求發大達，最想成為有些少生活品味嘅偽文青。