{ SKIP }
文:李羅渣  
POSTED ON 24 Sep 2016

圖片:Fox News

上星期講過巴神喺尼斯有咸魚翻生之象,唔知大家仲記唔記得上季尼斯都幫過另一位進攻球員重生,佢就係賓艾化。前季佢仲喺紐卡素時被外借去侯城,點知因為態度問題俾當時領隊布魯士開名批評兼彈鐘,返到紐卡素後仲被提前解約。點知去到尼斯就上陣37場入咗18球,今季仲俾巴黎聖日耳門收購,曾幾何時同賓施馬睇齊嘅「里昂希望」好似得到遲嚟嘅春天,點知去到PSG,最近三場而家連個草地都未踩過,咁快又有個小低潮真係陰功豬。

圖片:Skysports

當年賓艾化同賓施馬唔止係「里昂希望」,更加係「法國希望」。後來兩人各奔前程,賓施馬唔使講啦,去到皇馬就風生水起,就算而家就快30歲都成日傳出有英超球會想搵佢加盟。不過賓艾化就天生有啲自負,後來打馬賽就扭屎忽花要去紐卡素,但轉會後因為獨食同傷患問題,所以無乜貨交,最後搞到要外借去侯城。但當時對曼聯嘅比賽去到35分鐘就被換出,領隊布魯士甚至對佢行蹤完全無興趣,最後要提早返紐卡素同被解約,再轉投尼斯。

圖片:Skysports


至於PSG領隊艾美利就話無特別針對賓艾化,只係佢會揀訓練表現最好嘅球員上陣,連隊友泰亞高莫達都叫賓艾化忍下,因為PSG實在有太多好球員,不過PSG上下都會幫助佢。不過又有消息話,因為艾美利覺得戴艾化太獨食,又唔肯回防,同佢講完又無改善,所以呢三場把幾火連俾佢入選都廢事,等下年一月就送佢返英超。

圖片:express.co.uk


如果賓艾化真係故態復萌,相信好多支持佢嘅球迷都會好失望,既然喺尼斯可以赤手空拳打出一片天,點解仲唔好好做人呢?其實賓艾化都29歲,無幾多時間可以打大球會。如果真係無同領隊鬧翻,不如努力啲練波甚至加操,令艾美利知道自己係球隊重要一員,當年碧咸都喺皇馬俾卡比路打入冷宮,一樣靠個人努力爭返球隊位置返嚟,賓艾化不如向咸爺學習下。


李羅渣 (facebook page: https://www.facebook.com/leerogerfcpage/)
八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員
由懶到出汁變成泰拳愛好者
除咗足球最鍾意就係睇戲、睇書、飲兩杯
唔求發大達,最想成為有些少生活品味嘅偽文青。





由Denis Villeneuve執導嘅史詩科幻大片《Dune: Part Two(沙丘瀚戰:第二章)》叫好又叫座,截止目前全球累計票房高達5.79億美元,於各大影評網站獲得高度好評,就連名導史提芬史匹堡亦給予高度肯定,大讚《Dune 2》 ...
hobby
【影視】史提芬史匹堡大讚《沙丘瀚戰2》:我看過最精彩的科幻電影之一
28 Mar 2024
因為「掌摑事件」而沉寂咗一排嘅Will Smith,今年夏天將聯同老拍檔Martin Lawrence再次回歸大銀幕,繼續搞笑互相鬥嘴。 經典動作喜劇《Bad Boys(重案夢幻組)》最新續集《Bad Boys: Ride or Die(重案 ...
hobby
【影視】Will Smith沉寂兩年回歸!《Bad Boys 4 重案夢幻重組再重組》公開首部預告
28 Mar 2024