{ SKIP }
文:李羅渣  
POSTED ON 22 Oct 2016


假如你係球迷又係機迷,每年9月同11月都會好忙。因為9月就出咗新一集《FIFA》同埋《Winning Eleven》,11月4日就會推出《Football Manager 2017》beta版。呢隻game視覺效果雖然無FIFA咁正,不過就真係過足領隊癮,無論你想幫利物浦首奪英超冠軍,為皇馬衛冕歐聯而戰,定係帶領利華古遜挑戰拜仁,呢隻game都滿足到你,我以前喺屋企試過玩到拍枱拍凳,好似自己真係領隊咁。我每次開game都一定要會玩返愛隊,不過FM每集都有唔少球隊好有趣味性,我就揀咗10隊推介俾大家。


李斯特城

上屆英超神奇奪冠,帶領一眾球迷經歷奇蹟之旅。今季要應付歐聯戰線綫,雖然歐聯分組賽三戰全勝要入十六強應該無乜問題,但英超8戰得8分排13位就令雲尼阿里好嬲豬,無咗簡迪鎮守中場嘅狐狸軍就等你嚟幫佢哋重振雄風。


新特蘭

我以前試過玩查爾頓同昆士柏流浪打護級,一次成功一次唔成功,護級真係仲難過爭冠軍。黑貓今季雖然有莫天才領軍兼積極增兵,但睇嚟佢哋前幾季嘅運氣已經用盡。到而家佢哋聯賽仍然未贏過波,今季英超隊隊都如狼似虎,幫新特蘭護級絕對有挑戰性。


阿士東維拉

上季以大熱姿態降班英冠,以為請歐聯教頭迪馬提奧就有運行,點知開季維拉只有1勝7和3負劣績,未到聖誕就要走人。球隊自有中國企業家夏建統入主後財力唔錯,要執靚隊波再上路唔係無可能,想過升班癮可以一戰。


紐卡素

賓尼迪斯有情有義,雖然上季尾加盟講明如果護級失敗肥賓可以隨時走人,不過呢位前利物浦領隊就選擇同紐卡素一齊重返英超,雖然主力韋拿度姆同唐辛都離隊他投,不過要上英超都仲係夠能力有餘,即使玩到升班,要留喺中游一樣唔難,相信一定令各位玩得過癮。


馬德里體育會

上季歐聯決賽再度挑戰皇馬失敗搞到領隊施蒙尼差啲請辭,仲有愛回家費蘭度托里斯獲得球會續約令呢隊打破西超壟斷嘅球隊吸引全世界球迷注意,陣中唔少球星成為唔少豪門嘅挖角目標,除咗要爭西甲贏歐聯,仲要扭盡六壬留住陣中有主力,玩家玩呢隊一定要熟悉今集遊戲新設嘅續約及轉會前談判系統。


帕爾馬

曾幾何時意甲七雄之一,保方、基斯普、中田英壽都效力過。去年因為破產盡賣家當兼被罰到意丁作賽,不過一季就已經升班到意丙。如果你鍾愛意大利足球,無理由唔幫帕爾馬重振雄風掛?FM未必有意丙玩?大把人整patch,怕乜鬼。


尼斯

上季打起咗賓艾化兼轉會去豪門PSG,今季免費簽到嘅巴洛迪利一樣重獲新生,巴神而家上陣6場就入咗球,而尼斯就暫時排喺法甲榜首。PSG就連續贏咗4屆法甲,大衛打巨人大家都鍾意,打FM就有機會更易做到。


河北華夏幸福

唔玩下偏門聯賽玩FM有咩意思先?如果你都同意不如挑戰下呢隊中超升班馬,河北升班後已經展示野心,先後簽咗謝雲奴同拿維斯,不過球隊喺7-8月成績插水式下滑,連領隊李鐵都慘被炒魷換來前曼城領隊柏歷堅尼上任,而家中超球會咁有米,粒粒皆星不是夢,係時候親手拉廣州恆大落馬。

威爾斯

如果你唔介意load game到天昏地暗,打FM玩國家隊都係一種樂趣,威爾斯近年火速崛起,上屆歐洲國家盃仲入埋四強。嚟緊威爾斯目標當然係打入2018世界盃決賽周,你就可以喺FM親自帶領一次神奇之旅。

巴西

以前巴西就話係足球王國,但世界盃同埋美洲國家盃之後大家都認為巴西已經唔再係勁旅,全靠里約奧運拎到金牌先幫巴西足球挽回少少面子,而家巴西中前場竟然係最弱一環,到底可唔可以重新建立一支充滿森巴風味兼可以贏盡所有嘅巴西真係非常有難度,自問係足球專家嘅話教巴西絕對係專業級挑戰。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達,最想成為有些少生活品味嘅偽文青

由Denis Villeneuve執導嘅史詩科幻大片《Dune: Part Two(沙丘瀚戰:第二章)》叫好又叫座,截止目前全球累計票房高達5.79億美元,於各大影評網站獲得高度好評,就連名導史提芬史匹堡亦給予高度肯定,大讚《Dune 2》 ...
hobby
【影視】史提芬史匹堡大讚《沙丘瀚戰2》:我看過最精彩的科幻電影之一
28 Mar 2024
因為「掌摑事件」而沉寂咗一排嘅Will Smith,今年夏天將聯同老拍檔Martin Lawrence再次回歸大銀幕,繼續搞笑互相鬥嘴。 經典動作喜劇《Bad Boys(重案夢幻組)》最新續集《Bad Boys: Ride or Die(重案 ...
hobby
【影視】Will Smith沉寂兩年回歸!《Bad Boys 4 重案夢幻重組再重組》公開首部預告
28 Mar 2024