大國崛起係唔同啲嘅，買game時人哋已經講明冇中文，買完之後都可以負評真係威！點解可以咁大條道理，原來佢哋玩話中國玩家佔今集遊戲銷量6%，排行第二，冇理由遊戲支持15國語言都冇中文份，於是就決定去Steam鬧爆遊戲。雖然Steam已經講明冇「中文語言」，但玩家留言仍然勁多負評，而且除咗大陸玩家狂派負評之外，唔少自稱香港玩家都有份助攻。

至於遊戲開發公司CEO Miles Jacobson就喺twitter話收到死亡恐嚇，亦話都唔係第一次，驚都未驚過。不過唔知係咪受到壓力影響，SEGA近日喺台北一個發布會上，宣布將來推出嘅遊戲都會同步加入中文版。雖然官方話會推出中文版，但暫時只係繁體中文，睇怕又會有一地玻璃碎喇。