{ SKIP }
文:李羅渣  
POSTED ON 23 Feb 2017


足總杯一向都係賭仔剋星,因為啲低組別球隊嘅實力往往都會以幾何級數提升,搞到唔少英超英冠球隊都死喺佢哋手上,真係年年都有驚喜。今季就彈起咗屬於非聯賽級別嘅林肯城,佢哋今屆已經先後殺低咗葉士域治同升班大熱白禮頓兩隊英冠球隊,上星期作客仲搞掂埋英超主場成績第三好嘅般尼,成為1914年以來第一隊入到足總杯八強嘅非聯賽球隊。不過呢隊神奇球隊嘅事你又知道幾多?


林肯城淘汰般尼官方精華


作客以1-0絕殺般尼嘅入球功臣係後衛拉傑特,佢本身係基寧咸青訓,2015年更曾經選入英格蘭C隊。而值得一提嘅係佢本身係一個阿仙奴球迷,不過因為基寧咸青訓經常需要週末要比賽,所以一直都未試過入酋長球場支持愛隊。所以當上場賽後被問到球隊入到八強想對邊隊,拉傑特就話梗係阿仙奴:「你諗下,第一次現場捧愛隊就係同佢哋對決,呢種感覺一定好神奇。」最後拉傑特如願以償,黎緊八強林肯城真係會作客阿仙奴,佢仲可能會負責防守山齊士或者基奧特,但我就比較想知如果林肯城咁巴閉做底埋槍手,拉傑特心情係點。



咁林肯城近況又如何?其實佢哋喺英格蘭全國聯賽(第一級)暫時以67分排緊第一,不過隨後幾隊都咬得好緊,要重返英乙仲未穩陣。10年前佢哋仲喺英乙時都有幾次透過附加賽殺上英甲嘅機會,不過都係功虧一簣,最後喺2011年以第23位完成賽季降班到全國聯賽直到而家。今次打出好成績,原來林肯城會方都有科水鼓勵士氣,贏咗般尼之後林肯城球員已經每人先袋5000鎊,如果入到四強會方會再派36萬鎊,對非聯賽球會嚟講真係相當闊綽。



至於上一隊殺入足總杯八強嘅非聯賽球隊就係昆士柏流浪,當時係第一次世界大戰完結前5個月,當時佢哋由前蘇格蘭國家隊前鋒James Howie帶領,佢吔喺十六強就以2-1贏咗伯明翰,不過八強作客利物浦就以同樣比數輸波出局結束佢哋足總杯神奇之旅。喺超過100年後嘅今時今日,唔知今次林肯城又可唔可以延續佢哋嘅神奇之旅?




李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯 唔求發大達,最想成為有些少生活品味嘅偽文青








由Denis Villeneuve執導嘅史詩科幻大片《Dune: Part Two(沙丘瀚戰:第二章)》叫好又叫座,截止目前全球累計票房高達5.79億美元,於各大影評網站獲得高度好評,就連名導史提芬史匹堡亦給予高度肯定,大讚《Dune 2》 ...
hobby
【影視】史提芬史匹堡大讚《沙丘瀚戰2》:我看過最精彩的科幻電影之一
28 Mar 2024
因為「掌摑事件」而沉寂咗一排嘅Will Smith,今年夏天將聯同老拍檔Martin Lawrence再次回歸大銀幕,繼續搞笑互相鬥嘴。 經典動作喜劇《Bad Boys(重案夢幻組)》最新續集《Bad Boys: Ride or Die(重案 ...
hobby
【影視】Will Smith沉寂兩年回歸!《Bad Boys 4 重案夢幻重組再重組》公開首部預告
28 Mar 2024