印象中已經第三次喺呢度講「小豬」舒韋恩史迪加，但憑佢今季喺曼聯嘅遭遇，又真係唔講唔得。第一篇文佢被摩佬雪藏、第二篇就寫佢喺足總杯正選上陣仲有好表現，今次就寫呢位非常專業嘅德國中場嘅新去向－－下季佢就會轉戰美職聯球隊芝加哥火焰，意味著呢位前德國隊長嘅球員生涯步向尾聲。星期五小豬就已經飛到慕尼黑去同芝加哥火焰嘅醫生進行體檢，而芝加哥火焰方面又指，小豬喺球隊嘅角色唔會打係慣常嘅左中場或者防守中場，而係進攻中場，負責入球工作。

堂堂一個世界盃得主、前德國隊長被領隊投閒置散，今季只有四次上陣機會，對佢本人以至球迷黎講當然係相當可。尤其之前足總盃久休復出對韋根正選上陣就交到入球同助攻，兼且做埋Man Of the Match，可以反映小豬努力練習唔係做樣。甚至退休後甚少對曼聯提出意見嘅費sir都話小豬大把貨，只係仍然尊重摩連奴唔用佢嘅決定。小豬星期二就喺facebook拍片多謝曼聯球迷支持，表示自己希望為球隊貢獻更多，但依家係時候作出改變，並祝福曼聯一切順利，都算非常厚道啦。

至於小豬喺新球隊會打進攻中場佢又應唔應付得黎？其實佢當年喺拜仁慕尼黑都打過呢個位，表現仲算唔錯。小豬雖然無速度，不過傳送同閱讀球賽能力都唔錯，本身亦有唔錯嘅埋門能力，加上美職水平同歐洲頂級聯真始終有差距，要佢打進攻中場都係一個唔錯嘅選擇嚟，唔知會唔會打到好似當年列基美咁呢？另一方面芝加哥火焰嘅戰術非常多變，今季打過打4-2-3-1、4-3-3、3-5-2，小豬又可以打哂成條中場線任何位，加上餓波已久，應該非常期待接受喺美國嘅挑戰。

小豬奮鬥足一季，但仍然唔能夠打動摩連奴，除咗曼聯球迷，連德國國家隊領隊路維都替佢感到不值，並支持小豬出國尋求改變。至於小豬臨走前仲有冇機會上陣？曼聯四月有成九場比賽，普巴受傷三個禮拜，靴里拉仲有一場停賽，加上卡域克年事已高，喺呢個決定來季有無歐聯打嘅最重要嘅時間，呢位德國中場或者仍然有機會上陣。無論你係曼迷定豬粉，呢兩個月要睇實曼聯嘅出賽名單，因為小豬真係睇得一場就少一場。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。