自從越黎越多人因為各種原因冇讓座而被人拍片放上網之後，我就好耐冇坐過地鐵－又貴過巴士、又唔係特別快、有位又唔坐得、久唔久仲會失驚冇神延誤又唔出聲，我做咩要攞苦黎呻呢係咪？

但係我都知有好多Gentlemen逼於無奈要坐地鐵返工，一早一晚鬼咁攰都冇得坐確係幾慘！等我介紹以下呢件「不讓座」神器比你啦！

上面張相純粹係搞笑，我要介紹嘅當然唔係佢。而係以下呢張由瑞士公司Noonee研發的「Chairless Chair」。呢張嘢嚴格上都唔算係一張「Chair」，外觀上佢只係兩條用鋁同碳纖維造，再用皮帶綁喺腳後面嘅外生骨架。特別嘅設計令你要戴住佢「追趕跑跳碰」都唔係問題，但只要一經啟動，內置嘅阻尼器就會張骨架固定在某一個位置並支撐你的體重，讓你放鬆腿部肌肉，咁就隨時隨地都有得坐啦！

Noonee指出「Chairless Chair」相當適合工廠或者餐飲業呢啲需要員工長期站立或走動嘅行業。計我話引入黎香港就冇得輸！我估就算啲阿婆見到都唔好意思叫你讓比佢掛？