{ SKIP }
文:MenClub 波特先生  圖:互聯網
POSTED ON 06 Jul 2018

轉型從來都唔容易,而運動員要由一項運動轉至另一項運動就更加係難上加難,但係世界上無野係無可能的,正所謂「只要有恆心,鐵柱磨成針。」就算玩開體操都可以轉型玩長跑,甚至取得好成績,佢就係屈旨盈Crystal,2017年香港渣打馬拉松女子10公里挑戰組亞軍(壯年組),跑出嘅時間為39分20秒。

Crystal嘅身型一睇就係典型嘅體操選手身型,而同大部份體操選手一樣,佢好快就需要面臨退役嘅關口。而離開體操後,Crystal並未有放棄運動,佢喺大學時期因為想令身體重投健康(其中一樣係為左減肥),佢開始接觸長跑,同時參加左學校嘅越野隊,因而展開自己嘅長跑之旅。

對於一位曾經嘅體操運動員,第一次接觸長跑又係咩感覺嘅呢?

「我記得第一次跑長跑嘅感覺係非常辛苦的,因為我本身係一個體操運動員,係好少跑步的,就算跑都只有喺跳馬呢個項目,最多就只係跑25米,所以我地嘅跑步練習都只會以短距離為主。回想當時第一次接觸長跑,我覺得真係好辛苦及好漫長,又會覺得悶,因為來來回回都係做一樣嘅動作,同時距離又長,可能需要維持20-30分鐘。」

雖然話就話辛苦,但係Crystal作為一名運動員,訓練都係家常便飯,佢好快就適應左,而其中佢亦搵到體操同長跑嘅共同點,從而令自己更容易跑落去。

「我覺得體操及長跑兩者相似嘅地方係堅持,當然佢地嘅運動性質好唔同,因為體操係比較多變,每個動作都唔一樣,而跑步就較為死板,只會重覆一個動作。不過兩者中間都需要有一份堅持去練習,經過無數嘅失敗及唔好嘅經歷,自己又要刻苦,你先可以達到好嘅成績或更高嘅境界。」

當然刻苦還刻苦,現實都係有好多野要兼顧,Crystal作為一名老師都有好多工作需要做,同時又要保持訓練,咁究竟佢每日係點安排時間嘅呢?

「我通常都會早起身,可能早上4:45就會起身,然後會先慢跑45-60分鐘,而如果喺賽季期間訓練可能會加長至90分鐘,訓練完之後先番工。8:30-16:30工作,放工後就會再到運動場練習,所以每日嘅時間表其實都相當緊迫。」

咁究竟呢樣又辛苦又長途又悶嘅運動有咩咁吸引Crystal繼續落去呢?

「每次跑都想進步呢種魔力係最吸引我的,雖然每次跑未必一定會進步,但係如果跑步比賽開始有啲成績的話,你就會好想再次突破自己,再挑戰自己睇下可以跑得有幾快,就係呢種魔力吸引我想去繼續進步。我好少同人比較的,較多係同自己比較,只要我跑得快過上次就已經會好開心,哪怕只係幾分鐘、幾十秒,甚至只係1秒鐘。」

咁跑步都係不外乎喺運動場、喺街或者喺跑步機上面跑,咁Crystal自己又鍾意跑邊度呢?

「我自己比較鍾意跑街,因為會無咁大壓力,你可以有機會望到海,中間又有花草樹木陪住你,環境空曠啲個人嘅心情都會開心啲,但有時候因為訓練需要限制每個圈嘅速度你先可以有機會進步,所以自己訓練上都會需要喺運動場進行。」

黎緊Crystal將會代表香港參加8月底嘅雅加達亞運會,雖然當地因為火山爆發令比賽嘅環境並唔理想,但係Crystal目標係跑出自己最佳時間,盡力做好自己就無悔了。

而另一個消息就係,Crystal自從跑完之前嘅東京馬拉松之後,就全心想再次投身成為全職跑手,所以佢老師嘅身份今年就會完結,下年佢就會以全職跑手嘅身份繼續去跑,去為香港爭光!

不論你對ViuTV持有甚麼態度,你都不能否認它近年為香港娛樂圈捧出一群至少有話題性的年輕面孔。單論《全民造星》系列就為大家「貢獻」出Mirror、Error、P1X3L、Collar四隊組合,再加MC張天賦、Mansonvibes 張進翹、A ...
people
【MenClub People】鍾意,己經夠啦 - Johnny Hui 強尼
30 Sep 2022
第一次親眼「見到」洪嘉豪,是去年年尾在Jace (陳凱詠) 的演唱會上。雖然當晚他只是作為觀眾於台下睇Show,但每到Jace準備邀請嘉賓上台時,我旁邊就會有個不知名男觀眾,不停用洪嘉豪欠他錢沒還似的語氣大叫「洪嘉豪 ...
people
【MenClub People】一步一腳印 - Kaho Hung 洪嘉豪
04 Jul 2022