Photos: Panasonic Japan

中國內地人曾經為電動廁板/電動智能廁板（可對應手機程式）著迷，呢種熱潮雖然稍有降溫，但電動廁板/電動智能廁板依然係強國家電Best Buy，尤其是嚟自日本嘅品牌。

日本松下電器（Panasonic）上周發表大計，指出未來10年嘅中國，將會係Panasonic洗碗碟機嘅最主要巿場。廠方自1960年代推出洗碗碟機，但經過接近60年，累計生產數目只有1000萬部，以家庭電器嚟講，呢個數唔算突出，應該話勉勉強強先啱。

Panasonic亦好老實話，洗碗碟機喺日本普及率唔高，以2014年數字為例，只有28.4%。有日本工業分析員認為，普及率低同日本主婦普遍樂於以人手洗碗，唔倚賴家電有好大關係。 

Panasonic目標喺2026年，將自家洗碗碟嘅累計產量增一倍，即係2000萬部，廠方高層亦講到明，今後將主攻中國巿場，繼去年喺中國內地推出洗碗碟機，2018年將新增嵌入式系列，專攻中產及高消費能力家庭用戶。

熟悉內地家電巿場嘅專家認為，儘管中國內地家電巿場仍然以「鬥平鬥賤」主導，但隨住大城巿生活水平急速改善，外國品牌高級及高智能家電喺未來五至十年將大有可為。可為？係唔係因為中國人懶呀？

……可能忙啫、攰啫……