我之前都曾經講過，無論陰晴風雨，我都會帶把遮係身，等有人喺街落起大雨嘅時候，我可以去遮啲冇帶遮嘅靚女。可惜呢招從來都冇成功過，但絕對唔係因為我個樣，而係根本就冇人知道我其實有呢份善心！

以下呢個由一班香港學生提出、正在Kickstarter集資嘅「Umbrella Here」就完全能夠幫到我！呢舊冬甩狀嘅物體可以裝在長遮的遮腳處，透過手機APP控制佢著燈，表示你願意「載客」。就算好好傾但係又冇留低美女嘅聯絡方式，你都可以上返佢地嘅網站，輸入當時的地點時間搵返你相遇嘅人！

而如果冇落雨嘅時候，「Umbrella Here」就會變成家中的天氣指示燈，以不同顏色的燈光表達不同天氣情況，提你帶遮出街。而且由於會以藍芽與電話連接，只要電話同把遮的距離太遠，電話就會出現提示，咁就唔怕留底把遮啦！

只要上Kickstarter投資USD$28 (約HKD$220)，就可以買到一個「Umbrella Here」，預計下年1月出貨！香港發明喎！要支持嘅！