日本網購業好發達，呢頭落單，轉嗰頭已幾乎送到門口。

不過，日本物流及速遞業競爭相當劇烈，再加上現時當地經濟不景氣，各大物流商都各出奇謀精簡物流車隊，務求慳錢慳油又慳到時間，對顧客而言，當然想運費平啲再平啲，而送件速度就最好快啲又快多啲啲啲。

以東京為例，不少商業及住宅區都人煙稠密，如果每每為速遞一個小包裏、一份細文件，就派一部輕型貨車，又或電單車，都幾費時失事。細路出大路，塞吓燈位，我睇你一日派到幾多單。

過去幾年（尤其是日本311地震之後），業界都先後有營運商推出以三輪單車在小區內派件，一來節能兼減排，二來方便減低燃油開支成本，三來真係有效提升派件速度。但係，傳統三輪單車齋靠對腳，又要車住啲信啊，你啲yahoo auction啊，你啲AV碟啊，好重㗎嘛，仲未計上斜路呢。

日本老牌物流商大和（ Yamato）運輸，於10月起至來年8月底，正式在東京試行以電動輔助（PAS）三輪單車作物流車，假若成功，將有機會在全日本的城巿地域推行。

這類車每充一次電可行25至33公里路，視乎選擇幾大電動輔助力度（有三個mode），據講即使選擇最輕微的一級，出力已相等於人腳架力的三倍，咁就唔駛踩到隻嘢咁啦。