可以瘋狂換衫嘅智能手錶，襯返每日嘅造型，大家有無興趣？去年Sony喺日本推出嘅「FES Watch U」將會喺7月6日登陸香港，呢隻錶採用咗Active matrix e-Paper電子紙技術製成，可以喺錶面及錶身顯示儲存咗嘅24款圖案，用家可以因應每日衣著及心情，隨意轉換手錶的風格。

「FES Watch U」分別有銀色及黑色款，銀色款錶面為礦物玻璃，而黑色款就配上防反射塗層嘅藍寶石玻璃為錶面。呢隻錶嘅錶殼除咗100%不銹鋼製造，仲有IPX 5/IPX 7防水級別。

究竟點先可以連錶帶都轉圖案？因為「FES Watch U」用咗一張輕薄、可摺曲嘅Active matrix flexible e-Paper電子紙製成，令到錶身輕巧靈活。此外，e-Paper電子紙喺待機模式下唔會消耗電力，亦同時保持錶身嘅圖案顯示。