Tesla創辦人兼CEO Elon Musk日前接受知名科技界YouTuber Marques Brownlee訪問，佢指出Tesla有機會喺3年之內推出平價版嘅電動車款，而售價只需2.5萬美元(約19.6萬港元)，但佢都承認呢個目標係非常難實現。

經常喺YouTube發布影片嘅科技達人Marques Brownlee喺8月17日訪問Elon Musk，而Elon Musk指有機會3年內推出售價2.5萬美元嘅平價版電動車，但由於Tesla係以小規模嘅生產模式，要推出平價版汽車與通用、福特等汽車大廠競爭就比較困難，所以要令到電動車價格令大眾都能夠負擔，就需要結合科技進步及經濟規模嘅幫忙。

Elon Musk以手提電話嘅發展進程與汽車製造作比較，佢指出初期手機除咗貴之外，體積龐大兼且無乜功能，但通過多年嚟嘅發展後，如今嘅智能手機已經可以透過科技發展、大規模生產，令到手機價格可以去到大眾能負擔嘅水平。另外，相對於「2.5萬美元電動車」，根據Elon Musk喺8月份財報聲明指出，目前Tesla Model 3售價仍要49000美元起，較當初所講嘅35000美元起嘅售價仍有一段距離。