3D打印技術已經唔係咩新鮮事，相信唔少人都曾經接觸過，不過3D金屬打印就非常少見喇。日前HP發布咗可以打印金屬模具嘅商用3D金屬打印機Metal Jet，而每部Metal Jet都只係一個重型機櫃嘅大小，而且毎部售價低至40萬美元，令3D打印技術可以走進重型工業。

喺3D金屬打印出現前，塑造金屬嘅方法一般包括模具鑄造、沖壓、鑽孔及、銑削表面，甚至係用激光切割。而HP嘅Metal Jet可以透過一種較現有技術高50倍效率嘅「體素級黏著劑噴塗成型技術(voxel-level binder jetting technology)」，以比行業競爭者多4倍噴嘴冗餘及2倍打印橫條進行金屬打印，令Metal Jet比現有技術更節省成本及能提高效率。

官方指出，Metal Jet打印時會喺平面上鋪上一層薄薄嘅金屬粉末，然後用打印頭穿過該層金屬，並噴射微小粘合劑以固體金屬，當完成一層後會鋪設新一層金屬粉末，然後再噴射另一層粘合劑，而完成一個尺寸430x320x200毫米嘅打印金屬，大約需要4至5個小時。

HP Metal Jet負責人Tim Weber指出， 公司會為主流金屬，特別係鋼材進行批量生產，目前已經與經驗豐富嘅金屬製造合作夥伴以及包括Volkswagen及Johnson & Johnson醫療設備等客戶簽署協議。

來源：Cnet