傳聞喺東京嘅地底一直都隱藏住一個巨型地下神殿，而神殿嘅真身終於由Google map曝光，而且更有埋google街景帶你參觀呢個神秘地方。

呢個被稱為東京地下神殿嘅地方，正確名稱其實係首都圏外郭放水路。Google Map近日就公開呢個本來禁止拍攝嘅地方，等大家可以全景欣賞。「神殿」位於首都圈內的埼玉縣春日部市，深藏於國道16號地底50米。呢個建於1992年嘅超大型排水系統，耗資超過千億日圓，目的係為疏導附近區域因大雨而形成嘅洪水，令市民免受水災困擾。

放水路水全長6.3公里，連接五個高達八層樓高嘅巨大蓄水井，並由一共59支超巨型混凝土石柱支撐，入面仲有調節排水嘅裝置。巨型石柱令建築物變得特別莊嚴，加上氣氛咁有feel，自然係拍攝熱門地點，而且特別受特撮片歡迎，所以幪面超人、特命戰隊Go Busters同埋Ultraman The Next都喺呢度取景。如果大家睇完覺得好正，想親身去參觀的話其實是ok的，不過就要提早預約，費用全免。

首都圏外郭放水路
官網︰http://www.ktr.mlit.go.jp/edogawa/gaikaku/kengaku/index.html
地址：埼玉県春日部市上金崎720
電話：048-746-0748
開放參觀時間：每週二至周五，每日固定三場。(必須於參觀日前一個月至一星期報名)