美國海軍已經有對付無人機用嘅激光砲台，而反無人機系統已經單係軍事上嘅課題，更漸漸走向我哋日常生活當中。雖然無人機為我哋帶嚟好多方便同好處，但亦因不受管制同濫用而引發出唔少問題。早排喺美國更有人喺無人機裝上手槍然後遙控發射，事件引起廣泛關注後警方開始介入調查。甚至有無人機喺火災現場阻礙消防直昇機進行救災工作，令人開始注意無人機嘅負面影響。

最近一間英國公司推出一套名為AUDS嘅反無人機保安系統，呢套系統利用雷達同紅外線嚟監察同干擾無人機，當無人機進入警戒範圍就會自動啟動，系統更有鏡頭可以拍低過程，而且全天候24小時自動監察。系統用到嘅雷達具備8km偵察範圍，而鏡頭更有熱能探測功能，所以呢套高科技保安系統造價高達100萬美元，一般市民當然難以負擔，但對於企業同需要高度保護私隱嘅名人富豪嚟講，可能會係一套令佢哋安心嘅系統。