早排Apple推出Apple Music，周圍鋪天蓋地咁介紹有幾勁，又話一定要裝，點樣影響串流市場。結果臨近3個月試用期滿時，身體就突然變得十分誠實，不停見到有post教大家點樣停用Apple Music，咁到今日到底仲有幾多人支持Apple Music呢？

目前Apple Music嘅收費因地區而異，好似香港個人用戶就收$48，家庭用戶就$78，而服務喺6月30日喺一片「Wow」、「Awesome」同掌聲中上市，經過3個月試用期滿之後，大家熱情極速冷卻。有消息指大量Apple Music用戶喺免費試用期後停用，而前Apple Music總用戶數大約有1500萬，其中有一半預先關閉試用期結束嘅自動付費功能，即係試用期一完就唔用。剩低嗰一半用戶亦未必會全數繼續使用，所以業內人士就認為Apple Music嘅付費用戶大約得300萬至400萬，同坐8000萬用家嘅Spotify實在有太大差距，所以暫時唔會構成威脅。

雖然Apple Music目前人數上並唔理想，但似乎Apple唔會咁快放棄，事關佢哋就計畫今年內喺Android推出Apple Music，而且仲會陸續開放更多地區，好似最近就喺中國大陸上市，而且月費更低至2元人民幣，有分析師話低價未必可以令Apple Music興起，一來中西文化同品味差異太大，其次就係大陸本身已經有唔少類似app，加上部份更無視版權任聽任download，Apple Music想喺大陸發圍，相信有一定難度。縱使用戶數字上仍有上升空間，但有幾多人會畀錢聽歌就唔敢包喇。