年中曾盛傳Nikon將會發開D5嘅消息，近日終於得到Nikon證實，而且仲同時宣布開發無線傳送器WT-6同埋閃光燈SB-5000添。

現時Nikon最強相機係上年3月推出嘅D4S，預計像素、連拍速度同埋對焦系統都係升級目標。傳聞新機將會升級到2000萬像素，並唔會好似D810咁用到3600萬像素咁高，其中一個考慮可能係感光度控制，因為預計D5擴展4級嘅感光度可以達到ISO 1,638,400！連拍速度就有可能去到15fps，而且會採用173點對焦系統，至於時下旗艦機都有嘅4K拍片，亦好大可能會加到D5身上。

當然傳聞係講就無敵，而到底有幾多料係真就冇人知，因為Nikon只係講咗句正式開發就冇其他，但奇怪嘅係既然已經確定開發新機，但D810同D4s售價竟然不跌反升，12月1日開始仲喺英國齊齊加價，唔通D5仲有排等？