Google「買家」Sanmay Ved喺上年9月29日，發現Google嘅域名竟然失效！佢就趁Google未重新註冊域名嗰1分鐘，快手以12美元將Google.com據為己有。「呢鋪仲唔屈返Google一大筆？」正常人應該都會咁諗，但Ved竟然冇咁做，反而同Google達成協議取消交易，將域名擁有權讓返畀Google。原來Ved係前Google員工，佢買咗域名之後就同Google聯絡，Google咁順攤拎得返算係行運。為咗多謝Ved咁合作，Google就畀咗一筆錢作為報酬。

Ved一開始唔肯講收咗幾錢，只係話超過1萬美元，而最近Google終於講返實數出嚟，係6006.13美元。點解咁零丁？原來呢個銀碼喺hacker語言係代表Google。講返轉頭，Ved收到呢筆錢之後就將款項捐出嚟作為慈善用途，而Google知道佢咁有善心，決定將報酬加倍至12021.26。事情結局都算係皆大歡喜，可以一齊BBQ啦。