憑住風扇同吸塵機兩大名器而聞名嘅Dyson，早排放風話要玩過界推出美容產品，直到日前佢哋終於喺日本發表Dyson Supersonic風筒。就咁睇又係得窿，的確係似返佢哋嘅風扇，而其實Supersonic嘅原理都係用風扇差唔多，一樣係靠最耍家嘅氣流倍增技術同埋超強摩打。不過今次Supersonic主打嘅專利V9摩打體積就更細，而且葉片亦由一般11片增加到13片，聲稱風力係普通摩打嘅8倍。

好多風筒都可以好大風，不過就衰在嘈，夜晚吹頭真係成屋都知，所以Supersonic就特別研究到用聲學消聲器減低風筒噪音。除此之外，風筒有有四檔熱力、三檔氣流同一檔冷風設置，而且有埋智能溫度控制，唔會太熱吹傷頭髮同皮膚，所以官方介紹都係狂sell呢個point。不過到底要幾耐先吹得乾個頭就冇乜點提，真係要實物試過先知。

嗱，James Dyson就話過佢哋用咗5000萬鎊開發Dyson Supersonic，所以呢隻風筒都唔會係一千幾百就買得到，香港定價$3380港元，暫定今年夏天推出。值得留意係風筒仲包2年免費人工保修同埋配件更換服務，就算真係易壞都唔怕出面冇得整，佢哋包埋。