其實家陣睇戲嘅飛車追逐鏡頭，甚至係汽車廣告，好多時都係靠CG搞掂。不過專拍汽車廣告嘅The Mill，就搵埋JemFX、Performance Filmworks同Keslow呢幾間電影製作公司合作，生產出一套新系統Blackbird，只需要一個車架就可以變成任何汽車。

Blackbird只係一個裝晒感應器嘅車架，獨特嘅懸掛同輪胎系統可以隨時調節，底盤同車軸都可以任你改。至於驅動就靠車架嘅電動摩打控制，配合程式化操作令Blackbird可以模擬出唔同車款加速、煞車同轉向等特性。至於車殼、車身顏色、頭燈同面罩等等細節，就交返由電腦CG負責，咁樣就可以隨意變成任何汽車，不論家庭車、老爺車定係超跑都可以話變就變。

Blackbird另一好處係有3D掃描攝影機，可以幫你拍埋周圍嘅影像，令處理視點時可以有更多選擇。與此同時，利用Blackbird拍攝嘅光影同移動都會比全CG更自然，可以慳到大量後製時嘅成本，預計將來拍電影同汽車廣告都真係靠晒佢。其實如果加埋VR應用，用嚟整賽車遊戲都應該會好正！