最近有科學家將蜘蛛基因移到蠶蟲身上，令蠶蟲可以生產出有蜘蛛絲特質嘅「龍絲(dragon silk)」，仲計劃用嚟生產防彈衣添！唔通《蜘蛛俠》件戰衣就係用咗呢隻物料造？

蜘蛛絲主要成份係蛋白質，一般直徑只係頭髮1/10，比同樣粗幼嘅鋼絲更強更有韌力，所以係非常好嘅纖維物料。當中強度最高嘅係達爾文樹皮蜘蛛絲，比普通蜘蛛絲強韌兩倍。不過由於蜘蛛絲難以量產，所以應用範圍未夠廣範。直到2000年科學家搵到製造蜘蛛絲嘅DNA序列，然後就將蜘蛛基因移到蠶蟲身上，令蠶蟲可以生產出有蜘蛛絲特質嘅絲，而呢種絲被稱為「龍絲(dragon silk)」。

龍絲有出色嘅防火性，而且抗拉性仲勁過鋼，甚至係克維拉纖維嘅2/3。不過就更輕更有彈性，彈性係克維拉纖維嘅10倍，每公斤成本亦唔使300美元，所以有唔少分析都認為龍絲會係革命性材料，可以改變業界生態。Kraig Biocraft就睇中龍絲強韌而有彈性嘅優點，有機會生產全身用嘅避彈衣，而且已經拎到美軍嘅100萬美元資助，預計2017年4月就會有試版畀美軍測試。