家陣大部份航拍機都係用定焦超廣角鏡頭，但繼DJI公布有7倍變焦嘅Zenmuse Z3之後，Walkera亦跟住發表航拍機Voyager 4，更一口氣有16倍光學變焦能力，似乎航拍機準備走入光學變焦世代。

出開遙控飛機嘅Walkera近年積極開發航拍機市場，早前參加第三屆廣州無人機展覽時，就發表Voyager 4。主打有16倍光學變焦功能，利用平板電腦就可以進行遙控變焦，示範影片聲稱可以清楚放大2km景物添！雖然鏡頭焦距同實際操作資料都冇介紹，但估計等效焦距有1500mm。Voyager 4另一特點就係起降架喺飛行時會自動收起，方便三軸雲台進行360度拍攝。Voyager 4嘅Wi-Fi遙控範圍係1.5km，不過能夠支援4G網絡，所以話定可以飛得更遠。

講到Voyager 4最大缺點就係只得1920x1080@60 fps畫質，但由於變焦功能稱航拍機選擇唔多，所以就算定價高達2000美元仍然吸引到唔少人，至少執法同保安機構有好興趣用佢嚟進行監控工具，而Walkera喺展覽時亦有用監控功能作為賣點。