- SITE MAP
- |
- CONTACT US
- |
- ADVERTISING
- |
- PRIVACY
- |
- MOBILE
- |
- RSS
新版MacBook Pro終於推出,重點係加入Touch Bar取代實體F1至F12功能鍵。等足4年多條bar,仲將全部Port轉晒Thunderbolt。咁大刀闊斧嘅改動,會唔會係好事呢? 先講今次主打嘅Touch Bar,大家可能會話「有幾勁呀?2014年初ThinkPad X1都出過啦。」當年ThinkPad X1推出時仲被人鬧爆添,但今次Apple再玩呢個concept似乎發揮得比較好。今次MacBook Pro嘅Touch Bar取代F1至F12功能鍵,正在可以自訂功能鍵,而且對應唔同程式時就有唔同功能,好似你打開瀏覽器時就會變成返回上頁同首頁掣;當你執相剪片時更會切換成timeline或調色控制;聽歌時又可變成播放、暫停同顯示歌曲資料等;甚至當你覆email時畀打埋emoji都仲得。自訂功能拉落去就用得,完全直感操作,而且撳一下Fn掣就可以變返傳統F1至F12。 搞條bar出嚟,點解唔直頭篤芒呢?其實有啲情況Touch Bar用落比篤芒好,因為篤芒有時會擋住個芒,但如果將部份篤芒功能收落Touch Bar,好似選YES、NO呢一類選項時就咁去Touch Bar度揀就得。當執相時用Touch Bar就唔使下下吊起隻手去篤芒,舒服得多。Touch Bar嘅OLED屏幕都有Retina級數,所以顯示嘅圖像同資料都特別細緻,而右上角開關掣更支援Touch ID,內置Apple T1 Chip,開機同用Apple Pay買嘢都可以掂下就得。 由於轉用Touch Bar之後偷到唔少位,可將Touch Pad放大兩倍之餘,更令機身體積比上一代細23%,13"版本只得14.9mm,仲薄過現有13"MacBook Air,而15"機亦只得15.5mm厚。機身重量就分別係1.37kg同1.83kg,難怪今次發布會冇提MacBook Air,分分鐘之後都唔會出,各位Air機主真係要錫住用機喇。 今代MacBook Pro另一重大改頭就係由4個USB Type-C Thunderbolt 3插頭取代機身全部port,連Card reader都冇埋就有少少過份,呢次做USB分插同讀卡器嘅廠真係要多謝Apple。講返今次Thunderbolt 3嘅傳送速度係40 Gbps,比上代快兩倍,所以夠你直出兩隻5K Mon都冇問題。雖然機身改晒用Thunderbolt 3,但就留返3.5mm耳機位,冇學iPhone咁改用lightning。另一問題就係,如果你想將iPhone駁落去MacBook Pro時可以點呢?似乎要準備定一堆線先用得喇。 規格方面,新嘅MacBook Pro用咗Intel Core i5同i7(15"版)處理器,最低記憶配置為8GB RAM加256GB SSD,15"型號更有Radeon Pro 2GB獨顯,圖像處理能力大幅提升130%,而且有10小時續航力。喇叭同散熱都用咗新設計,喇叭嘅dynamic range更係上代兩倍。 至於機身顏色除咗本來銀色之外,就加入iPhone嘅太空灰,並無鋼琴黑、香檳金同粉紅色。雖然修身之後又靚仔咗,但個機身個蘋果Logo冇燈,好似爭少少囉。其實如果真係覺得Touch Bar多餘,仲有一個不設Touch Bar嘅13"版本。今次MacBook Pro售價分別係 $11,588(13")、$13,888起(13"連Touch Bar)同$18,588起(15"),而15"仲可以加$9,360升級到2TB SSD添。今日起有得訂,最快下星期送貨。 |