文:MenClub 胡說 圖:互聯網
POSTED ON 22 Jul 2014
不經不覺,專供美軍嘅機械大狗(Big Dog)已開發咗六年。當外界以為佢會好似「八萬五」無聲消失之際 ,近日有人發現佢喺2014年度環太平洋軍演(RIMPAC 2014)中出現,並由美國海軍陸戰隊參與測試工作,條片仲畀人放上youtube。 雖然「大狗」唔似《未來戰士》周身武器咁巴閉,但就肩負補給糧水彈藥嘅重任。「大狗」配四隻腳,最適宜喺崎嶇山路又或連軍車都去唔到嘅地帶,兼且孭得起180公斤貨物,都幾好力㗎,差唔多有36包5公斤袋裝米、或五個步兵嘅隨身裝備。 不過,唔少軍事迷都認為「大狗」距離服役的日子仍遠,你睇吓吖,佢喺演習過程,機體仲未有裝甲或防彈保護,又用緊高卡車引擎提供動力,計計埋埋,續航力只有32公里,仲要嘈到阿媽都唔認得。老老實實,喺大後方用都OK,要佢跟埋上前線,就等於同全世界講你喺邊。
|
|