依家講起Nikon One，大家可能都會記起近年推出嘅無反機仔系列，但今次賣出嘅Nikon One，其實係1948年生產，係Nikon最早期生產嘅相機之一。雖然未知邊個出價投得，但今次破記錄成交，對於出年就成立100週年嘅Nikon嚟講，都算係一份賀禮。

作為相機界龍頭之一嘅Nikon，原為成立於1917年嘅「日本光學工業」，成立初期曾經從事軍事工業生產，後來改為生產光學儀器，包括微顯鏡、望遠鏡同眼鏡鏡片等等，喺1930年代甚至用過Canon相機嚟製作鏡頭添，直到1948年佢哋先生產自家第一部相機。

日前喺奧地利一個拍賣會上，以384,000歐元賣出(約320萬港元)一部Nikon古董相機，創下Nikon史上最高拍賣價記錄。今次拍賣嘅相機係「Nikon One」，喺1948年4月生產，機身上更印有「made in occupied Japan」，屬於Nikon生產嘅第三部相機，由於佢係已知現存最舊嘅Nikon相機，所以特別有收藏價值，最終比目標價高出一倍成交。