{ SKIP }
文:MenClub Raphael  圖:互聯網
POSTED ON 21 Oct 2016

以下情況都係經驗之談,如果你飲Black Label就無咩所謂,酒友們鐘意點玩都得;但如果你開一枝好似Macallan嘅靚蘇威,或者其他年份佳釀去亂嚟,Sorry,坦白講你真係唔識飲酒,亦令你身邊認真飲威士忌朋友覺得無奈。而我相信,以大家豐富嘅飲酒經驗,肯定多過7個嬲豬Moment (程度由低至高)。


一、女伴超濃香水

呢個排最前,程度最低,因為好多女士都唔熟威士忌,佢地搽香水都係尊重約會場合啫。不過Whisky最看重聞香,如果你隔離位女伴嘅香水味太濃,你全晚都唔會聞到其他味,其實飲咩都無分別啦!


二、一味吹捧年份、價錢

酒場好多偽專家,對威士忌一知半解,但又會極力吹水,例如話30年一定好飲過其他年份、只睇得起某啲貴價品牌之類。通常呢啲朋友可以吹得好大,但實際品鑑功力仲差過普通人,一生只求虛榮,而非求佳釀。


三、用紙杯飲 (唔合適嘅酒杯)

呢樣我都試過,因為喺朋友屋企飲,又無合適嘅杯,咁唯有開枝daily whisky大家開心吓就算。愈靚嘅威士忌,愈需要用合適嘅酒杯品鑑,透明杯身觀察酒色,杯身曲線設計適度集中酒香,杯嘅厚度、質感,對味道都可以有好大影響。講真,威士忌tasting glass唔算貴,無就去買兩隻傍身啦。


四、喺雪櫃拎枝酒出嚟 (唔合適嘅酒度)

喂,呢枝唔係Vokda喎!威士忌通常適合於室溫品鑑,溫度對於酒液會有極大影響,Vodka無威士忌咁複雜,而且係飲Purities,雪唔係問題,但太凍嘅威士忌,酒香同味道亦會較為收縮,咁又點樣有效品嚐?


五、醉咗堅持飲

威士忌閒閒地都超過40% ABV,飲落又真係頗易醉,呢個係人之常情,每個人酒量唔同。不過如果你醉咗都堅持要飲,搞到儀態盡失,咁就係酒品問題啦!即使唔係靚威,飲其他酒都要量力而為啦,否則好易出事架嘛!


六、溝Mixer、亂加嘢

OK,Black Label溝綠茶大家都試過啦? 無問題嘅;但我亦見過有人嗌枝Macallan去溝Mixer,嗰一刻嘅心情猶如天堂跌落谷底一樣…… 喂,你溝完其實都分唔清佢係咩威士忌嚟架啦,何必開枝靚酒? 何必浪費大家金錢?


七、怒劈!!!

最後一項,亦係我覺得最嚴重嘅一項。威士忌絕對唔係愛嚟飲嘅烈酒!世上有咁多酒液,你何必揀一隻賣細膩、層次、複雜度嘅威士忌去怒劈? 酒過三巡除咗飲酒精你仲飲到啲乜?


CASIO G-SHOCK推出嘅「農家橡樹」GA-2100系列近年再牽起一股電子錶熱潮,品牌亦力推女性市場,繼2021年推出女性向嘅「GMA-S2100」系列後,最新又推出更嬌小、顏色更柔和嘅「GMA-P2100」系列,或者會係大家嘅情人節禮 ...
watchesandwine
【潮流】ITZY代言!G-SHOCK「農家橡樹」推更嬌小女裝版
22 Jan 2024
日本威士忌品牌「WHISKY MEW」主要銷售由日本著名威士忌收藏家「山岡秀雄」親自試出及推薦嘅威士忌,並經常與各大日本動漫作品合作推出聯乘作品。而最新嘅聯乘,就係同士郎正宗創作嘅著名Cyberpunk作品《攻殼機動隊 ...
watchesandwine
【日本】WHISKY MEW聯乘《攻殼機動隊》推限量威士忌
10 Jan 2024