還記得去年嘅差不多呢個時候，我喺MenClub做咗一個關於Whisky Flights嘅專題報道，而一年後嘅今日，Whisky Tasting已經係眾多酒吧嘅常駐Menu，並唔難搵。對初心者而言，要學識品鑑Whisky，最重要係辨識到酒液嘅風味同特性，一場試飲之中，若果有3、4款作品，飲家會更容易Get到分別喺邊，當然有威士忌大師現場講解就更理想啦。嚟緊3月中，上環Safe Bubbles & Malt搞一場日本威士忌試飲，共6款頂級佳作，仲有請來專家Louis Lee同大家傾計，都只係收HK$400左右，真係荀到爆!

今次試品嘅6款威士忌，MenClub已經喺情人節配酒專題介紹過其中一款，就係來自日本笹之川嘅963威士忌21年，單係呢枝高年份作品都賣緊3千幾銀，所以話俾四舊去試飲真係抵到笑。喺呢度同大家介紹返呢6枝威士忌先 :

963日本調和威士忌21年

混和蘇格蘭與日本威士忌原液嘅高年份作品，酒精度達58%；聞香時候散發出濃厚嘅香甜氣息，雲尼拿、焦糖，仲有啲橡木桶帶來嘅辛澀，入口仍然感受到橡木桶嘅氣息，猶如Brown Sugar嘅香甜，Powerful得嚟非常舒服。

963日本調和純麥威士忌8年

8年嘅作品雖然較為年輕，但已經擁有好優美嘅結構，59% ABV，酒香散發出橘子、檸檬皮嘅果香，亦有牛油曲奇嘅香甜同埋少少好似梅酒嘅酸味。入口係鮮明嘅大麥氣息，糖漬檸檬皮，橡木桶伴隨少少蜂蜜甜味，收結係少少香辛同雲尼拿味嘅合奏。

963日本調和穀麥威士忌 (無年份)

Malt & Grain混合，加上Non-vintage嘅作品，已經可以幻想到Grain Whisky嘅輕柔特性。同樣係59%ABV，酒香瀰漫檸檬、青草、薄荷同橘子等清新氣息，更深一層感受到穀物同糖漿嘅香味；入口時仍然係清新香澀，雲尼拿、穀物、青草，仲有少許苦澀味嘅Dry Finish。

武藏純麥威士忌

介紹完笹之川嘅963後來到東亞酒造所生產的Golden Horse系列—武藏。睇見金黃酒色，已經察知其優雅風格，甜美嘅蜂蜜、檸檬、少少花香同埋清新嘅草本氣息，優雅且非常平衡。豐盈而清新嘅風味喺味蕾迴蕩，大麥、草本、隨伴好迷人嘅煙燻味。

武州調和威士忌

另一款東亞酒造嘅作品，比先前嘅武藏更為舒柔高雅；清新嘅檸檬草香，伴隨優雅嘅花香味，呢種特別嘅乾花氣息令人印象深刻。入口係非常清新嘅感覺，大麥香氣、檸檬同埋蜂蜜糖果，收結有少少香辛Spiciness，仲有啲茉莉花香添。

Ichiro's Malt雙蒸餾純麥威士忌

呢度先要講吓Ichiro同羽生嘅關係，話說羽生蒸餾所於2004年正式閉廠，秩夫酒廠嘅持有人Ichiro先生就接收咗佢地嘅設備同酒液存貨，重新包裝出售，其中就有Ichiro’s Malt同埋大家好熟悉嘅撲克牌系列，所以呢枝酒嘅「Double Distilleries」其實係指羽生同埋秩父。至於呢款威士忌嘅風味係點? 呢度賣個關子，等各位飲家喺Tasting自行發掘啦。

日期 : 3月17日 (星期五)
時間 : 8:00 – 10:00 PM
地點 : Safe Bubbles & Malt
費用 : 3月3 號前早鳥價 : HK$380，之後原價 : HK$420
查詢 : http://safebar.hk/rsvp/jp_whisky_20170317 OR 2505 9988