上星期鬼佬旅遊天書《Lonely Planet》公佈2019年全球十大最佳旅遊城市，你實以為各個城市，一定位於歐洲各小國，點知香港，鄰近嘅城市——深圳竟然位列第二，嘩！你睇大灣區發展竟蓬勃到咁地步？！

雖然排名第一嘅係丹麥首都哥本哈根，《Lonely Planet》就稱讚當地樂福沙樂恩由舊船塢轉型為美食及手工市集，豐富丹麥街頭飲食文化，加上著名主題公園「Tivoli Gardens」令人印象深刻，不過我嘅注意力都係放喺深圳之上。

《Lonely Planet》編輯主任賀爾（Tom Hall）認為，深圳是21世紀初世界發展最快的城市之一，建有不少「超現代的建築、創新的環保做法和一系列設計獨特的新設施」。啱呀，你睇深圳福田區，個個地鐵站都幾乎有一個超大型嘅商場，有齊妹豬最喜愛嘅探魚、海南雞煲同埋喜茶，仲大鑊係附近總有一個俾人打卡嘅景點、公園、場地之類，你睇深業上城上面堆彩色牆，真係設計好晒。

好老實，你星期六日上深圳coco park、海岸城，分分鐘少人過你去沙田，又有嘢食有嘢玩，你叫班妹豬點唔上去？

他仲特別提到，廣深港高鐵通車後，旅客由香港到深圳的需時大幅減少，相信會是旅客到北京及上海以外的中國另類新旅遊點。

你信唔信遲下班高官會講呢單嘢講幾耐？不過外國人都唔係不知國情嘅，一句「香港平價夜生活翻版」，你就知道原裝正版，都依然喺香港（就快無）。