Netflix 嘅出現，除咗令我哋可以以合法嘅途徑睇世界各地嘅各種影視節目外，更令我哋知道一間網絡影視公司嘅自家出品，絕不比傳統嘅影視娛樂界別嘅老行家輸蝕。

講到 Netflix 嘅自家出品，除咗之前 MenClub 呢度寫過嘅幾套之外，更有同 Marvel 聯手策劃嘅 Marvel's Daredevil 《漫威夜魔俠》，最後最為出名同埋最有話題性嘅一套自家系列就一定係岩岩喺月頭開咗第六季嘅 House of Cards 《紙牌屋》。

不過今日嘅主角《毒梟》 Narcos 其實都係一套由 2015 年就開始播映嘅 Netflix 自家劇集系列，至今已經推出咗三季。故事主講述一位活躍喺 1970 至 1990 年代嘅哥倫比亞大毒梟 Pablo Escobar，如何由一名小小嘅毒品拆家，靠著不同嘅手段以及自身頭腦慢慢打造麥德林集團呢個毒品王國，從而靠毒品生意將自己躍升成曾登上《福布斯》富豪榜嘅大毒梟。

之不過，嚟緊嘅《毒梟》第四季《毒梟：墨西哥》則為全新嘅篇章，再唔係以Pablo Escobar 作藍本，反之就係以另一著名毒梟 Félix Gallardo 作背景；而主線地點亦由哥倫比亞，向上少少移師到墨西哥中美洲大地；另外故事就係以 1980 年代，Félix Gallardo 將墨西哥嘅走私市場網路串聯起嚟再一步步建成自己嘅毒品王國，當然一邊發展亦要與美國緝毒局探員一方周旋。

到底故事以及其描寫手法會否同上三季類似呢；定係真係好似 Netflix official 咁解釋《毒梟：墨西哥》係一套同《毒梟》完全不同嘅作品呢？好快就可以知道啦，因為《毒梟：墨西哥》將於 11 月 16 日喺 Netflix 首播。