皇馬重新迎來施丹執教，今夏基本上必定大肆擴軍，而其中車路士主力夏薩特將會係佢引援嘅頭號目標。而日前，皇馬已經正式向車路士報價7000萬鎊收購夏神，雖然車路士已經拒絕呢份報價，但佢地亦知道自己難以留住呢位核心，所以亦只能夠盡量用一個更好嘅價錢將佢出售。因此車路士日前亦正式對外公佈，球隊出售夏薩特將只會接受超過9850萬鎊嘅報價，亦即係話對夏薩特今夏離隊開綠燈啦！

夏薩特與車路士嘅合同將於2020年夏天到期，雖然車路士一直希望可以與佢提前續約，但夏神明顯無意繼續留在車路士，並一直夢想加盟皇馬，所以一直未有動筆續約。深明夏神嘅意向，車路士亦無意人財兩失，所以盡早將佢出售先係明智之舉。

適奉一直想收購夏神嘅施丹回歸皇馬，而主席佩雷斯亦已經明言願意大灑金錢擴軍，所以車路士亦無意同錢作對，就喺皇馬出價7000萬鎊收購夏神後，車路士亦唔拖長談判，決定直截了當開價，只要有球隊願意出9850萬鎊，夏薩特就係佢地架啦！

當然，皇馬方面會唔會再向車路士討價還價仲係未知之數，但係有傳皇馬有意將巴利作為籌碼向車路士收購夏薩特，唔知如果車路士答應要巴利的話，皇馬要加幾多錢呢？