19世紀初Barber Shop已在英國出現，為一眾紳士提供剪髮、美容、剃鬚等服務，當時係上流社會嘅玩意，嚟到宜加呢個年代Barber Shop巳經變得愈來愈普及，亦跟住潮流改變。不過當中嘅服務好多人都唔了解，今次就同大家一齊嚟窺探Barber Shop嘅世界。

當中Barber Shop服務包括剃鬚或修剪鬚型，但係香港男仔較少會留好長嘅鬚，未必個個都可以嘆到有人幫你剃鬚嘅享受。英式Barber Shop會係幫客人修鬚前，利用幾塊熱毛巾敷係面上。到底咁係為乜？

【打開毛孔】

原因好簡單，因為毛巾嘅熱力可以令面上毛孔打開，令毛囊容易暴露出嚟。剃都剃得容易D。另外亦可以當係皮膚的鬆弛劑，令面部放鬆，減少剃鬚剃傷嘅可能性，同剃鬚帶來嘅傷害。

【令你變軟】

第二係變軟你嘅毛髮，熱毛巾除左可以打開毛孔更可以令毛髮變得柔軟。毛髮軟左剃鬚嘅時候就會減少阻力同減少傷害，剃得更順滑更方便。

【嘆住剃鬚】

除左以上嘅功能，熱毛巾敷面當然仲都係一種享受。乜都唔洗做，合埋眼俾熱力敷住塊面，嘩～個種暖粒粒嘅感覺真係「ki-mo-chi」。有D髮型師仲會用帶有薄荷香味嘅毛巾幫客人敷面，簡直係一種特別嘅享受。

【冰火敷面】

剃完鬚後，髮型師仲會再俾另一個毛巾你敷面，但同啱啱嘅熱毛巾相反，係一條由雪櫃扲岀嚟嘅毛巾。呢仲冷敷具有相反嘅效果係熱敷後必做嘅步驟。理由好簡單：可以封閉毛孔，令毛孔變得緊緻。亦可以冷卻同鎮靜皮膚。冰火嘅感覺係咪好多男人都試呢。

如果想嘆又唔想去Barber Shop，其實都可以自己係屋企DIY試下嘅，但千祈就唔好用過熱嘅毛巾啦。不過Barber Shop服務真心值得大家都感受一次。