近年唔少酒店都會加入不同嘅主題來吸引顧客。就例如以電影為主題等，不過今次要講嘅呢間就可以滿足一眾男士衝上雲霄嘅夢想。

東京羽田機場附近嘅「 The Haneda Excel Hotel Tokyu 」酒店為慶祝開業 15 周年，新增一間「Superior Cockpit Room」飛機駕駛艙雙人房。房內除了有正常嘅設備外，更有一個 1:1 以波音 737-800 駕駛艙作藍本嘅專業級飛行模擬器，供俾客人一嘗衝上雲霄嘅滋味。

不過如果要玩飛行模擬器嘅話要留意，因為入住並非可以俾你瘋狂衝上雲霄。若要使用飛行模擬器需額外付費，費用方面係90分鐘30000日元，模擬器最多可容納2人，另外亦有時段限制只在日間開放，另有教練陪同。除此之外由於日間會開放飛行模擬器體驗，所以入住客房的客人只能在下午6點後及只能租借一晚，而一晚酒店費用方面則是25300日元。

對於價錢方面就真係見人見智，而且酒店規矩亦十分不便，不過對於因飛機Delay而滯留機場嘅朋友，可能都係一個唔錯嘅選擇。有興趣嘅朋友可以係 7 月 18 號於官網預約。