| |
熱刺主場白鹿徑球場大大話話都用左118年，絕對係英格蘭數一數二歷史悠久嘅球場，為咗應付球會未來發展，白鹿徑球場亦將會重建，上星期日熱刺主場2-1贏曼聯就係重建前最後一場白鹿徑嘅賽事，新球場要到2018年先用得，下季熱刺就需要借用溫布萊球場作為主場比賽。其實今季熱刺喺歐洲賽已經用溫布萊作為主場比賽，但呢個英格蘭國家隊主場就唔多關照熱刺，下季變相全作客，熱刺仲可唔可以好似今季咁好成績先？ | |
| |
| 今季熱刺喺歐洲賽主場成績係1勝1和2負，熱刺歐聯分組雖然唔算上簽，不過對住摩納哥、利華古遜同莫斯科中央陸軍，要出線都唔係無可能，之但係熱刺喺歐聯主場唔見咗6分真係幾傷，雖然溫布萊2007年先開始啟用，可以容納90000人，草地質素又好，但係話明主場，有時嗰種熟悉嘅感覺係好重要，溫布萊可能衰在太新淨啦，而且隊中除咗幾位英格蘭球員之外，都無邊個有喺溫布萊比賽嘅經驗，表現唔多唔少有影響。 | |
| |
| 之但係熱刺經過幾年改革，終於擠身強隊之列，想成為大球會真係要坐呢架順風車，所以白鹿徑而家重建絕對係合適時機。白鹿徑球場本身只可以容納36000人左右，重建後就可以坐到60000人，足足多成倍，唔止咁樣，熱刺亦已經同NFL (美式足球聯盟)搞咗個10年計劃，新主場起好後會每年舉行最少兩場美式足球賽事，新白鹿徑球場將會係熱刺嘅搵錢大計一部份，不過球隊表現上可能要承受一啲陣痛。 | |
| |
| 換主場有排衰唔係亂講，最現眼報就係熱刺死對頭阿仙奴。仲喺高貝利嘅阿仙奴，可以話見證咗阿仙奴嘅輝煌時光，但自2006年阿仙奴啟用酋長球場後，阿仙奴到而家都只係贏過兩次足總盃冠軍，而由於球會要還清酋長球場嘅債務，令雲加只能夠買潛力幼齒當主力用。而最影響臨時發揮嘅，就係酋長球場觀眾同球場距離比起以前遠咗，令阿仙奴主場氣勢都有所影響，下季熱刺真係唔易捱，睇普捷天奴有無計了。 | |
李羅渣 (facebook page: https://www.facebook.com/leerogerfcpage/) 八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員 由懶到出汁變成泰拳愛好者 除咗足球最鍾意就係睇戲、睇書、飲兩杯 唔求發大達，最想成為有些少生活品味嘅偽文青。 | |
