如果要數現今防守能力最強嘅球員，相信有唔少球迷都會第一時間諗起兩屆年度最佳防守球員馬刺嘅Kawhi Leonard，呢位小前鋒擁有極強嘅人盯人能力，就算好似LeBron James同Kevin Durant兩位NBA最頂級嘅球員，都曾經喺Leonard嘅防守下吃過唔少苦頭。 | |
| |
| 過去，年度最佳防守球員基本上都係中鋒嘅囊中物，但係Leonard卻憑著外線出色嘅防守，成功連續兩次奪得呢個獎項。作為對手，只要你稍一唔留神，你個波就會被Leonard偷走，就算你成功過左佢，佢亦都有能力從後封阻你。所以單係計外線嘅側翼防守力，Leonard應該係現今NBA最強嘅球員。 | |
| 而除左本身已經冠絕聯盟嘅防守，Leonard近兩年亦完全開發出超強嘅進攻能力，佢喺2015-16球季場均攻入21.2分，係佢生涯首次場均得分超過20分，而黎到2016-17球季，佢嘅場均得分更一口氣提升至25.5分，排名全聯盟第9位。要知道Leonard效力嘅馬刺係一支團體型球隊，所以就算作為球隊嘅第一核心佢亦都唔可以太獨食，所以佢場均出手次數只有17.7次，係得分榜排名前十位入面出手次數最少嘅球員。 | |
| Leonard嘅進攻有唔少人都認為同已退役嘅湖人傳奇Kobe Bryant非常相似，特別係佢嘅Fadeaway Shot動作接近同Kobe一模一樣。再加上Leonard嘅身體質素極好，速度亦高，所以防守球員都很難阻止佢。就係咁，Leonard被認為係現役NBA中攻守兼備最好嘅球員，就算係「籃球之神」Michael Jordan亦同意呢一點。 | |
| 而近日呢位馬刺核心就黎到中國進行活動，其中佢就被記者問到如果被自己防守時，還能否得分。對於呢個問題，Leonard並無直接回應，佢表示：「我現在比唔到答案你住，但係好快會出現結果。」以Leonard嘅防守能力，基本上以單防黎講都差唔到去到巔峰，所以佢所講嘅好可能係佢嘅進攻喺新球季會更上一層樓，屆時就算係佢自己嘅防守都守唔到佢，更何況係其他球員。 | |
| Leonard目前只係岩岩26歲，但係上季佢已經係MVP嘅最後三強之一，再加上佢仍處於不斷進步嘅階段，喺未來佢絕對好大機會奪得MVP獎項，成為繼Tim Duncan之後第一位拎到呢個獎項嘅馬刺球員，要知道Duncan最後一次拎MVP已經係2003年嘅事，所以相信馬刺嘅球迷一定已經等左好耐啦！ | |
|
