人生處處都有伏，但最陰濕成日笑騎騎放毒蛇嘅永遠都係你最愛嘅枕邊人！10個拍過拖嘅男人，有11個都一定會畀女人問過一堆懶係有得揀，其實係冇得你揀嘅問題︰「你愛唔愛我呀？」、「你覺得我肥唔肥呀？」、「你記唔記得今日係咩日子呀？」……真係隔住個Mon都聞到陣伏味！基於女人心海底針嘅真理，面對呢啲濕9問題，真係點答都死，有咩方法可以答得盡量貼近標準答案，免去一死？！冇架！呢個世界冇標準架！個女人嘅心意就係呢個世界嘅準則，與其諗Model Answer，不如諗點嘅答案先氹到條女！

韓國網站웃기就針對「女友5大可怕問題」，整理出模範答案，巴打下次面對「考題」時，一於試試佢，可能有機會避免「然後……佢嬲咗我」嘅局面！

問題1︰「你有幾愛我？」
回答：「搞到你要問呢個問題……真係好對唔住，我愛你！（然後將佢抱緊處理）
危機︰條女會笑住咁拍打你︰「即係有幾愛？」，而你一直答唔出咁就GG了。

問題2︰「我係咪肥咗？」
回答：「搞到你問出呢個問題……真係好對唔住，我哋去食（女友鍾意食嘅肥嘢）！」
危機︰條女會黑面問你︰「咁我即係有冇肥到？」，然後你會定咗喺度等被嬲。

問題3︰「乜乜乜同我比邊個靚啲？」
回答：如果你唔係靚過乜乜乜，我點解要同你拍拖！
危機︰條女發爛咋︰「即係第時有人靚過我你就會飛起我啦！」，然後嬲咗你。

問題4︰「同朋友一齊玩，好開心啦？」
回答：「我有同朋友見面咩？可能我成日諗住你，搞到以為係同你一齊添。」
危機︰條女會好嚴肅叫你全名︰「XXX我問緊你嘢你唔好玩嘢呀！」，然後嬲咗你。

問題5︰「你知唔知今日係咩日子呀？」
回答：「知道～今日係我第N次（數字愈大愈好） 愛上你嘅日子。」
危機︰條女會睥實你︰「即係你唔記得今日係咩日子啦！」

究竟係韓國網站提供嘅答案中，定係Mean娜估嘅危機中呢？有冇巴打可以即刻Try Try佢？:D